सबै प्रकृया पूरा भएर दूतावासमा अन्तरवार्ता नपाएका आप्रवासी भिसा आवेदन साढे ३ लाख
प्रकाशित मिति : श्रावण १५, २०८० सोमबार
अमेरिकी दूतावासहरुमा अन्तरवार्ताको मिति पाउनका लागि प्रतिक्षारत नेशनल भिसा सेन्टरले प्रकृया पूरा गरिसकेका आप्रवासी भिसाका आवेदनहरुको संख्या झण्डै साढे ३ लाख रहेको अमेरिकी सरकारको विदेश मन्त्रालय ब्यूरो अफ कन्सुलर अफेयर्सले जनाएको छ । अहिलेकै गति कायम रहेमा नेशनल भिसा सेन्टरमा कागजपत्रको प्रकृया पूरा भएर स्वीकृत भइसकेका ती आवेदनले दूतावासहरुमा अन्तरवार्ता पाउनका लागि अधिकतम ९ महिनासम्म कुर्नुपर्ने हुनसक्छ ।
जुन ३० सम्म कागजातको प्रकृया पूरा भएर अन्तरवार्ताका लागि तयार आवेदनहरुको संख्या ३ लाख ८८ हजार ३ सय ९७ रहेको थियो । तीमध्ये ३६ हजार ५ सय ७६ आवेदनको अन्तरवार्ता जुलाईका लागि तय गरिएको थियो भने ३ लाख ५१ हजार ८ सय २१ आवेदनहरु अन्तरवार्ताको मिति पाउन प्रतिक्षारत रहेका छन् । तीमध्ये प्राय परिवार र रोजगारमा आधारित आप्रवासी भिसाका आवेदनहरु हुन् ।
कोरोना महामारीभन्दा अगाडि क्यालेन्डर वर्ष २०१९ मा औसतमा ६० हजार ८ सय ६६ आवेदकहरू प्रत्येक महिना अन्तर्वार्ताको समय तालिकामा पेन्डिङ रहेका थिए। यो संख्यामा अहिले ६ गुणाबृद्धि भएपछि आवेदकहरुले दूतावासहरुमा अन्तरवार्ताका लागि प्रतिक्षा गर्ने अवधि लामो बनेको छ ।
जुन महिनाको तुलनामा जुलाईमा अन्तरवार्ताका प्रतिक्षामा रहेका सबै प्रकृया पूरा गरेका आवेदनहरुको संख्या अझै बढेको छ । साथै अन्तरवार्ताका लागि दूतावासहरुमा पठाइएका आवेदनको संख्या समेत जुनको तुलनामा जुलाईमा कम छ । जुनमा ३७ हजार ९ सय ५ आवेदनहरुको अन्तरवार्ता तय गरिएको थियो ।
यद्यपी मे महिनाको तुलनामा भने जुन र जुलाईमा सबै प्रकृया पूरा गरेर अन्तरवार्ताको प्रतिक्षामा रहेका आवेदनहरुको संख्यामा कमी आएको छ । फेब्रुअरीमा त यसरी प्रतिक्षामा रहेका आवेदनहरुको संख्या ४ लाख नाघेको थियो । जुन चालु आर्थिक बर्षकै सबैभन्दा उच्च हो । सन् २०२१ को कुनै विन्दाुमा यो सख्या ५ लाख नाघेको थियो ।
अमेरिकी दूतावास काठमाडौंले हरेक महिना झण्डै ५ सयदेखि एक हजारको हाराहारीमा आप्रवासी भिसाका अन्तरवार्ताहरु लिइरहेको छ । जुन महिनामा अमेरिकी दूतावास काठमाडौंले ४४७ जनालाई आप्रवासी भिसा जारी गरेको थियो भने मे महिनामा ९६५ जनालाई आप्रवासी भिसा जारी गरेको थियो ।
अप्रिलमा अमेरिकी दूतावास काठमाडौंले १०८२ जनालाई आप्रवासी भिसा जारी गरेको थियो । त्यस्तै मार्चमा उक्त दूतावासले ७४३ जनालाई आप्रवासी भिसा जारी गरेको थियो । यो संख्या फेब्रुअरीमा ६०१ थियो ।
