एसाइलम गर्नेलाई फास्ट ट्रयाकमा वर्क परमिटको माग, नयाँ आउने नेपाली लगायतलाई टीपीएस दिन आग्रह
प्रकाशित मिति : श्रावण २६, २०८० शुक्रबार
न्यूयोर्कमा श्रम र अध्यागमन अधिकार संगठनहरूको एक शक्तिशाली समूहले बाइडेन प्रशासनलाई एसाइलम खोज्ने आप्रवासीहरूको लागि अधिकार विस्तार गर्न आह्वान गरिरहेको छ । उनीहरुलाई फास्ट ट्रयाकमा वर्क परमिटको व्यवस्था गर्न आव्हान गरेको हो । जसले आश्रय प्रणाली ओभरफ्लो भइरहेको सन्दर्भमा सामाजिक सेवाहरूमा तनाव कम गर्न मद्दत गर्नसक्ने अपेक्षा गरिएको छ ।
युनियन र मानव अधिकारकर्मीहरूको गठबन्धनले होमल्याण्ड सेक्युरिटी सेक्रेटरी अलेहान्द्रो मेयोर्कासलाई थप मानिसहरूलाई टीपीएस दिन आग्रह गरेको छ, जसले आप्रवासीहरूलाई अमेरिकामा कानुनी रूपमा लामो समयसम्म बस्न र काम गर्ने अनुमति दिने प्रावधान रहेको छ ।
अमेरिकामा एसाइलम आवेदन दिएकाहरुले वर्क परमिट प्राप्त गर्नका लागि कम्तिमा १८० दिन कुनुपर्छ । वर्क परमिट प्राप्त गर्नु अगाडि उनीहरूलाई सार्वजनिक सेवाहरूमा सीमित पहुँच हुनुका साथै उनीहरु र उनीहरुको परिवारलाई पाल्नका लागि काम गरेर कमाउनमा समस्या हुने गरेको छ । जसका कारण न्युयोर्कमा एसाइलम खोज्ने कैयन आप्रवासीहरू मिडटाउन म्यानहट्टनको सडकमा सुत्न बाध्य भएका छन् ।
गठबन्धनमा अफ्रिकन कम्युनिटी टुगेदर, मेक द रोड न्यूयोर्क र प्रोजेक्ट लाइटहाउस जस्ता संस्थाहरू सामेल छन्। समूहले अमेरिकी उपराष्ट्रपति कमला ह्यारिस र विदेशमन्त्री एन्टोनी ब्लींकेनलाई बोधार्थसहित होमल्याण्ड सेक्युरिटी सेक्रेटरी अलेहान्द्रो मेयोर्कासलाई एक पत्र पठाउदै खतराबाट भागेका आप्रवासीहरू थप मद्दत र अधिकारको हकदार भएको उल्लेख गरेको छ । उनीहरुबाट अमेरिकी श्रम बजारले पनि उल्लेखनीय लाभ उठाउन सक्ने पत्रमा उल्लेख गरिएको छ ।
अमेरिकी राष्ट्रपति जो बाइडेनलगायत सरकारी नेताहरूसँग विकल्पहरू रहेको पत्रमा उल्लेख छ । भाग्यवश राष्ट्रपतिसँग टीपीएसको उपकरण रहेको र त्यसले नयाँ एसाइलम आवेदकलाई वर्क परमिटमा तुरुन्त पहुँच दिने पत्रमा उल्लेख छ । पत्रमा नेपाल एल साल्भाडोर, होन्डुरस र भेनेजुएला लगायतका १६ देशहरूका आप्रवासीहरूका लागि टीपीएस विस्तार गर्न अनुरोध गरिएको छ । पत्रमा बाइडेन प्रशासनलाई ग्वाटेमाला र कङ्गोलगायत धेरै देशहरूका नागरिकलाई टीपीएस प्रदान गर्न समेत आग्रह गरिएको छ ।
गत वर्षदेखि लगभग १ लाख शरण खोज्नेहरु न्युयोर्क सिटीमा मात्र आइपुगेका छन् । त्यसमध्ये ५७ हजार २ सय भन्दा बढी सिटीको हेरचाहमा छन्। मेयर एरिक एडम्स लगायतले हरेक दिन ५ सय भन्दा बढी एसाइलम खोज्ने आप्रवासीहरु आउँदा आश्रय प्रणाली भरिएको घोषणा गरेका छन् ।
