न्युयोर्कमा मन्दिर बनाउन महापुराण, १० लाख डलर संकलनको लक्ष्य
प्रकाशित मिति : श्रावण ३२, २०७४ बुधबार
सन् २०१० मा न्युयोर्कमा भब्य महापुराणको आयोजना गरेको थियो, रिजउड नेपाली समाजले । महापुराणमा उपस्थीतहरुले झण्डै ६ लाख डलर डोनेशनको घोषणा गरेका थिए । जसमध्ये संकलित झण्डै ४ लाख डलरबाट मन्दिर र सांस्कृतिक केन्द्र बनाउन जग्गा खरिद गरिएको थियो । सन् २०११ मा ५ हजार बर्गफुटको जग्गा खरिद गरिएको हो ।
अबको केहीदिनपछि अर्थात् अगस्त २३ देखि २९ सम्म रिजउड नेपाली समाजले पुनः महापुराणको आयोजना गरेको छ । न्युयोर्कको ज्याक्सनहाइट नजिक रहेको सत्यनारायण मन्दिरमा हुँदैछ, सप्ताहब्यापाी महापुराण । र यसपटकको महापुराणबाट संकलित रकमबाट किनिएको जग्गामा दुर्गा मन्दिर र सांस्कृतिक केन्द्र निर्माणको योजना बनाइएको छ ।
दुर्गा मन्दिर र सांस्कृतिक केन्द्रको सपना
न्युयोर्कमा नेपालीहरुले दुर्गा मन्दिर र सांस्कृतिक केन्द्रको सपना धेरैबर्ष पहिले देख्दै आएका हुन् । सन् २००४ ताका नै न्युयोर्कमा नेपाल घर बनाउने योजना बनाइएको थियो । तर त्यो योजनाले मुर्तरुप पाउन सकेन । त्यसको ६ बर्षपछि सांस्कृतिक केन्द्र र दुर्गा मन्दिर निर्माणको लागि न्युयोर्कको रिजउडमा महापुराण लगाइयो । तर त्यो महापुराण सांस्कृतिक केन्द्र र दुर्गा मन्दिर निर्माणको लागि प्रयाप्त हुन सकेन । प्रयाप्त रकमको अभावमा निर्माण कार्य अगाडि बढ्न नसकेपनि रिजउडमा जग्गा भने खरिद गरिएको थियो ।
यसैबीचमा न्युयोर्कको ज्याक्सनहाइटमा शेर्पा किदुगले शेर्पा गुम्बा खरिद गर्न सफल भयो । गुम्बाको बेसमेन्टमा अहिले पनि विभिन्न कार्यक्रमहरु हुँदै आएका छन् । कुनै कार्यक्रम गर्नुपरेमा नेपालीहरुलाई निकै सहज अवस्था आएको छ । अब भने रिजउडमा पनि दुर्गा मन्दिर र सांस्कृतिक केन्द्र निर्माणको सपना पुरा हुने सम्भावना उच्च देखिएको छ । तर त्यसका लागि अझ दुईबर्ष कुर्नुपर्ने रिजउड नेपाली समाजका वर्तमान पदाधिकारीहरुको भनाई छ ।
मुल समारोह समितिका संयोजक राजेश भट्ट
महापुराणको तयारी तीब्र
न्युयोर्कको रिजउडमा दुर्गा मन्दिर र साँस्कृतिक केन्द्र बनाउन दोश्रो बृहत श्रीमद् भागवत महापुराणको तयारी तीब्र पारिएको छ । आगामी दुईबर्षभित्र दुर्गा मन्दिर र साँस्कृतिक केन्द्र निर्माण गर्न १० लाख डलरको महत्वाकांक्षी लक्ष्य सहित महापुराणको आयोजना गरेको हो ।
सन् २०१० मा जस्तै यसपटकपनि बाचन प्रवीण पण्डित दीनबन्धु पोखरेलले श्रीमद भागवत महापुराणको बाचन गर्नुहुने भएको छ ।
दिनबन्धु पोखरेल ।
दिनानुदिन बढ्दै गइरहेको नेपाली आगमन र अमेरिकामा जन्मेका बालबालिकाहरुलाई सांस्कृतिक केन्द्रका माध्यमबाट एक असल संस्कारी नेपालीको पहिचान दिन सकियोस् भन्ने उद्देश्यले दुर्गा मन्दिर र साँस्कृतिक केन्द्र निर्माण गर्न लागिएको रिजउड नेपाली समाजले जनाएको छ ।
महापुराणको तयारी लगभग अन्तिम चरणमा पुगेको महापुराण कार्यक्रमको मुल समारोह समितिका संयोजक राजेश भट्टले खसोखासलाई जानकारी दिनुभयो । उहाँले भन्नुभयो –‘हामी विभिन्न समितिहरु निर्माण गरेर महापुराण सफल बनाउन लागि परेका छौं । महापुराणको उद्देश्य पूरा गर्नमा हामीले ब्यापक तयारी गरिरहेका छौं । ’
रिजउड नेपाली समाज विसुद्ध सामाजिक सेवाको भावनाले स्थापित गैर राजनितीक तथा गैर नाफामुलक संस्था हो । नेपाल र नेपालीको धर्म कला, संस्कृति र परम्पराको जगेर्ना गरी रिजउड तथा अमेरिकाको विभिन्न राज्यमा छरिएर बसेका नेपालीहरुमा आइपर्ने विविध समस्या समाधानमा सहयोग पुु¥याउने उद्देश्यले सन् २००३ मा न्युयोर्क राज्यमा दर्ता भएको हो ।
संकलन होला त १० लाख डलर ?
महापुराणबाट दुर्गा मन्दिर र साँस्कृतिक केन्द्र निर्माणका लागि १० लाख डलर संकलनको महत्वाकांक्षी लक्ष्य लिइएको छ । तर यो महत्वाकांक्षी लक्ष्य पुरा होला त ? महापुराणको मुल समारोह समितिका संयोजक राजेश भट्ट भन्नुहुन्छ –‘ १० लाख डलरको लक्ष्य पुरा गर्ने हामीसँग योजनाहरु छन् । ट्रस्टीदेखि संस्थापक सदस्यसम्म बनाउने विभिन्न योजनाहरु छन् । दाताहरुले सांस्कृतिक केन्द्रमा निशुल्क कार्यक्रम गर्नेदेखिका विभिन्न सुविधाहरु समेत प्राप्त गर्नेछन् । ’
रिजउड नेपाली समाजका अध्यक्ष एवं मुल समारोह समितिका अध्यक्ष रविकिरण कोइराला
त्यस्तै रिजउड नेपाली समाजका अध्यक्ष एवं मुल समारोह समितिका अध्यक्ष रविकिरण कोइराला भन्नुहुन्छ –‘सन् २०१० मा त हामीले झण्डै ६ लाख डलर संकलन गरेका थियौं । अहिले ७ बर्ष पछाडि आइपुग्दा हामीलाई सांस्कृतिक केन्द्रको आवश्यकता अझ टड्कारो महसुस भएको छ । यो अवधिमा नेपालीको संख्या र स्तर दुबै बढेको छ । त्यसैले लक्ष्य अनुशारको् रकम उठ्नेमा हामी विश्वस्त छौं ।’
कलशयात्राको तयारी
महापुराणसँगै कलशयात्राको तयारी पनि भइरहेको छ । जलले भरिएका कलशको पुजा गरिसकेपछि कलशयात्रा सुरु गरिने मुल समिति संयोजक राजेश भट्टले जानकारी दिनुभयो । सुरुमा रिजउडमा र त्यसपछि ज्याक्सनहाइटको डाइभर्सिटी प्लाजाबाट कलशयात्रा गरिने उहाँले जानकारी दिनुभयो ।
१०८ कलश सहित विभिन्न समाजका धर्मगुरुहरुका साथ नगरपरिक्रमा गरिने भएकाले कलशयात्रालाई महत्वका साथ हेरिएको छ ।
१ हजार ८ को समिति
महापुराणका लागि १ हजार ८ जनाको मुल समारोह समिति गठन गरिएको छ । तर त्यो समिति प्रयाप्त नभएको र धेरै जना नअटाएको भन्दै समिति थप्ने तयारी गरिएको छ । वाचन प्रविण पण्डित दीनबन्धु पोखरेलको प्रमुख बाचकत्वमा संगीतमय धारावाहिक प्रवचन हुने भएकाले महापुराणलाई धेरैले चासोका साथ हेरेका छन् ।
संयुक्त राज्य अमेरिकाका सकेसम्म सम्पूर्ण राज्यका महानुभावहरुलाई प्रतिनिधित्व गराइने, नेपाल सरकारका प्रतिनिधि, न्यूयोर्कका मेयर तथा विभिन्न धर्मगुरुद्वारा समुदघाटन गरिने, दैनिक ५०० देखि १००० जनासम्म कार्यक्रम स्थलमा उपस्थित गराईने, नजिकका राज्यबाट पाल्नुहुने भक्तजनहरुको लागी सुलभ बसको व्यबस्था मिलाइने , दैनिक उपस्थित ५०० देखि १००० जना सम्मलाई भोजन प्रशादीको व्यबस्था मिलाइने, विमानस्थलदेखि कार्यक्रम स्थल सम्म तथा बसस्टप देखि कार्यक्रम स्थल सम्म सुलभ यातायातको व्यवस्था मिलाइने , दैनिक ३०० देखि ५०० जनासम्म चन्दादाता महानुभावहरुलाई प्रसंशापत्रद्वारा सम्मान गरिने , दैनिक छुट्टै विशष्ट व्यक्तित्वहरुलाई प्रमुख आतिथ्यको व्यवस्था गर्ने आयोजकले जानकारी दिएका छन् ।
महापुराणका लागि २१ उपसमितिहरु
महापूराणका लागि २१ वटा विभिन्न उप—समिती गठन र कार्य विभाजन गरिएको छ ।
१ हजार ८ सदस्यीय मुल समारोह समितिमा अध्यक्ष रवि किरण कोइराला रहनुभएको छ भने संयोजक राजेश भट्ट हुनुहुन्छ । त्यस्तै आर्थिक उपसंयोजकहरुमा तुलसीराम आचार्य, सुमन शाह, विराज रिजाल र हरिप्रसाद काफ्ले रहनुभएको छ । त्यस्तै चन्दादाता संकलन तथा ट्रस्टी उपसंयोजकमा बेदप्रसाद खरेल रहनुभएको छ । समन्वय उपसंयोजकमा दीपकराज काफ्ले, विज्ञापन सामाग्री वेवसाइट उपसंयोजक सहकुल खत्री, प्रचारप्रसार उपसंयोजक भुवनेश्वर अधिकारी र अग्नी ढकाल, संचार उपसंयोजकमा खसोखास साप्तहिक, प्रसाद उपसंयोजकमा जगन्नाथ पराजुली र कृष्ण दाहाल, भजन उपसंयोजकमा गोपी ढुंगाना र मोहन गौतम, साउण्ड सिस्टम तथा क्यामेरा उपसंयोजकमा मिलन कुमार शाही, स्वयंसेवक तथा सुरक्षा उपसंयोजकमा राजेश सापकोटा र सुनिल पौडेल रहनुभएको छ ।
त्यस्तै अतिथि सत्कार तथा जनसम्पर्क उपसंयोजकमा रवि किरण कोइराला, राजेश भट्ट, मोहन ज्ञवाली, श्री पराजुली, बेदप्रसाद खरेल, सरोज श्रेष्ठ, दिपकराज काफ्ले र अमित शाह रहनुभएको छ । यातायात उपसंयोजकमा धनेश लामिछाने र रञ्जित मल्ल ठकुरी रहनुभएको छ । फ्रन्ट डेस्क तथा रिसेप्सन उपसंयोजकमा हेमरत्न शाही हुनुहुन्छ भने महिला तथा बालबालिका उपसंयोजकमा कमला निरौला र शुस्मा पन्थ रहनुभएको छ । मण्डप श्रृंगार उपसंयोजकमा कृष्ण पन्त, सर्टिफिकेट तथा अवार्ड उपसंयोजकमा नवराज खड्का, मेडिकल टिम उपसंयोजकमा सुनिता भण्डारी पुजा सामाग्री उपसंयोजकमा पंडित हरिनारायण सापकोटा, कलश यात्रा उपसंयोजकमा पण्डित उद्धव शास्त्री र संजिता कोइराला रहनुभएको छ ।