ट्रम्पबाट एटलान्टा जेलमा आत्मसमर्पण, मगशट र फिंगरप्रिन्टपछि धरौटीमा रिहा
प्रकाशित मिति : भाद्र ७, २०८० बिहीबार
मोटरकेडमा आएका पूर्व राष्ट्रपति डोनाल्ड ट्रम्पले एटलान्टाको फुल्टन काउन्टी जेलको पछाडिको प्रवेशद्वारबाट प्रवेश गरेर आत्मसपर्मण गरेका छन् । उनी त्यहाँबाट २० मिनेट पछि बाहिरिएका थिए । बिहीबार एटलान्टाको जेलमा ट्रम्पका लागि बुक गरिएको थियो । ट्रम्प न्युजर्सीको नेवार्कबाट निजी विमानमा एटलान्टा उडेका थिए । र पुलिसको स्कर्टिङका साथ फुल्टन काउन्टी जेलमा बेलुका ७ बजेर ३५ मिनेटमा लगिएको थियो । अन्य व्यक्तिहरू जस्तै उनको फिंगरप्रिन्ट र तस्बिर खिचेपछि धरौटीमा रिहा गरिएको छ ।
जेल रेकर्ड अनुशार ट्रम्पलाई बिहीबार राती फुल्टन काउन्टी जेलमा गिरफ्तार गरी राखिएको उल्लेख छ । तर यो निकै छोटो समयका लागिमात्र थियो । उनलाई कैदी नम्बर पी०११३५८०९ को रूपमा दर्ता गरिएको थियो। जेल रेकर्डले ट्रम्प ६ फिट ३ इन्च अग्लो र २ सय १५ पाउण्ड तौल भएको देखाएको छ । उनी नीलो आँखा र गोरो वा स्ट्रबेरी कपाल भएको रूपमा सूचीबद्ध थिए ।
ट्रम्प र उनका अन्य १८ सह प्रतिवादीहरूलाई आत्मसपर्मणका लागि शुक्रबार मध्यान्हसम्मको डेडलाइन दिइएको थियो । सोमबारको शुरुमा २ लाख डलर धरौटी र अन्य रिहाई सर्तहरूमा उनको सम्झौता पछि ट्रम्पले आत्मसपर्मण गरेका हुन् । पहिलो दुई सह प्रतिवादीले मंगलबार आत्मसमर्पण गरिसकेका छन्, जसमा ट्रम्पका पूर्व वकिल जोन ईस्टम्यान पनि छन् ।
ट्रम्पलाई अपराधी उद्यमको प्रमुख भएको आरोप लगाइएको छ जुन राज्यमा उनको चुनावी पराजयलाई उल्टाउने व्यापक षडयन्त्रको हिस्सा थियो। अहिलेसम्म पूर्वराष्ट्रपतिलाई चारवटा छुट्टाछुट्टै आपराधिक मुद्दामा ९१ वटा अभियोग लगाइएको छ । जसमध्ये यो चौथो मुद्दा हो । अरु तीनवटा मुद्दाहरुमा पोर्न स्टारलाई रकम दिएको सम्बन्धि, सरकारी गोप्य कागजात लुकाएको सम्बन्धि र चुनावी परिणाम उल्टाउन खोजेको सम्बन्धि छन् ।
अगस्ट १४ मा एट्लान्टामा रहेको ग्रान्ड जूरीले ट्रम्प र अन्य १८ जनालाई पूर्व राष्ट्रपतिको २०२० को चुनावी पराजयलाई उल्टाउने कथित प्रयासबाट उत्पन्न राज्यको आरोपमा अभियोग लगाएका हुन् । फुल्टन काउन्टी डिस्ट्रिक्ट एटोर्नी फानी विलिसको नेतृत्वमा व्यापक अनुसन्धानमा ल्याइएका आरोपहरूले पूर्व राष्ट्रपति र उनका सहयोगीहरूले २०२० को राष्ट्रपतिको चुनावमा हस्तक्षेप गर्नका लागि गरेको सबैभन्दा बढी प्रयासलाई समेट्छ। यदि ट्रम्प २०२४ मा पुन निर्वाचित भएपनि यो मुद्दामा उनले आममाफी दिन पाउने छैनन् । किनभने ट्रम्पले आफूलाई वा आफ्ना सहयोगीहरूलाई कुनै पनि राज्यको कानूनको सजायको लागि क्षमा दिन सक्षम हुनेछैनन् , न त उनले आरोपहरू ल्याउने फुल्टन काउन्टी अभियोजकहरूलाई खारेज गर्न सक्षम हुनेछन् ।
अभियोग कागजातमा जर्जियाका सेक्रेटरी अफ स्टेट ब्राड राफेनस्परगरसँग ट्रम्पको कुख्यात फोन कल समावेश छ जब उनले राफेनस्परगरलाई राज्यमा जित्नको लागि आवश्यक भोटहरू फेला पार्न भनेका थिए । त्यस्तै सेप्टेम्बर २०२१ मा उनले राफेनस्परगरलाई पठाएको पत्रमा पनि राज्यको भोटको प्रमाणिकरण खारेज गर्न आग्रह गरेका थिए । सिभिल केसको क्रममा पत्ता लगाइएको सर्भिलेन्स भिडियो, टेक्स्ट मेसेज र अन्य सञ्चारहरूले जर्जियामा २०२० को चुनावी नतिजाहरू उल्टाउन ट्रम्प र उनका सहयोगीहरूले गरेको प्रयासको अनुसन्धान गर्ने अभियोजकहरूलाई आवश्यक प्रमाण प्रदान गरेको थियो ।
मुद्दाका अन्य धेरै सह प्रतिवादीहरूले डिस्ट्रिक्ट एटोर्नी कार्यालयसँग आफ्नो धरौटी सम्झौताका सर्तहरूमा पनि सहमति जनाएका छन्। सोमबार धरौटी सम्झौताको विवरण जारी गर्नु अघि ट्रम्पका वकिलहरू जेनिफर लिटिल, ड्र्यू फाइन्डलिङ र मारिसा गोल्डबर्गले डिस्ट्रिक्ट एटोर्नीको कार्यालयका अधिकारीसँग भेटेका थिए । निफर लिटिल र मारिसा गोल्डबर्ग जर्जियाकै वकिल हुन् भने ट्रम्पका अन्य वकिलहरूले धरौटीको दृष्टिकोण र ट्रम्पको आगामी गिरफ्तारीबारे पर्दा पछाडिबाट काम गरिरहेका छन् ।
ट्रम्पको धरौटी आदेशमा उल्लिखित रिहाका सर्तहरू यस मामिलामा अन्यहरूमा राखिएको भन्दा बढी व्यापक छन्। उनका केही सह प्रतिवादीहरू जस्तो नभई पूर्व राष्ट्रपतिलाई यस मुद्दामा आफ्ना सह प्रतिवादीहरू, साक्षीहरू र अभियोग नलगाइएका सह षड्यन्त्रकारीहरूलाई लक्षित गरी सोशल मिडिया प्रयोग गर्न स्पष्ट रूपमा प्रतिबन्ध लगाइएको छ।
फुल्टन काउन्टी सुपीरियर कोर्टका न्यायाधीश स्कट म्याकफीले हस्ताक्षर गरेको आदेशमा प्रतिवादीले यस मुद्दामा संहिता वा साक्षी हुन वा अन्यथा न्याय प्रशासनमा बाधा पुर्याउने कुनै व्यक्तिलाई डर देखाउने काम गर्न नहुने उल्लेख छ । जसमा सामाजिक सञ्जालमा गरिने पोष्टहरू वा सामाजिक सञ्जालमा अर्को व्यक्तिद्वारा गरिएका पोष्टहरूको शेयर समेत समावेश हुनेछन् ।
फुल्टन काउन्टीको यो मुद्दामा पहिलो पटक ट्रम्पको लागि रिहाका सर्तहरूमा नगद धरौटी र सोशल मिडिया मार्फत धम्की दिन निषेध समावेश गरिएको हो । यो यस वर्ष पूर्वराष्ट्रपति ट्रम्पविरुद्ध चौथो आपराधिक मुद्दा हो। अघिल्ला केसहरूमा गिरफ्तारी र पेन्डिङ ट्रायल पछि ट्रम्पको रिहाइका शर्तहरु धेरै हदसम्म नियमित प्रकारका थिए।