थप ५ हजार गैर आप्रवासी भिसाका अप्वाइन्टमेन्ट उपलब्ध गराउँदै अमेरिकी दूतावास काठमाडौं
प्रकाशित मिति : भाद्र ८, २०८० शुक्रबार
अमेरिकी दूतावास काठमाडौंले भिजिटर भिसा लगायत गैर आप्रवासी भिसाका थप ५ हजार अप्वाइन्टमेन्ट खोल्ने भएको छ । जसबाट गैर आप्रवासी भिसामा अमेरिका आउन चाहनेहरुले थप अप्वाइन्टमेन्टहरु लिनसक्ने अपेक्षा गरिएको छ ।
दूतावासले भनेको छ – ‘अप्वाइन्टमेन्टबारे खुसीको खबर । थप अप्वाइन्टमेन्टहरू उपलब्ध हुँदैछन् । हामी आगामी दिनहरुमा ५ हजार गैर आप्रवासी भिसा अप्वाइन्टमेन्टहरू खोल्दैछौं ।’
अमेरिकी दूतावास काठमाडौंले बेला बेलामा गैर आप्रवासी भिसाका थप अप्वाइन्टमेन्टहरु खुलाउदै आएको छ । नियमित भिसा अप्वाइन्टमेन्ट पाउन २ बर्षसम्म लाग्ने गरेको अवस्थामा दूतावासले नयाँ अप्वाइन्टमेन्टहरु खुलाउदै आएको छ ।
अमेरिकी दूतावास काठमाडौंमा भिसाको अप्वाइन्टमेन्ट पाउन मुस्किल रहेको गुनासो आइरहँदा त्यसलाई सम्बोधन गर्न दूतावासले यो प्रयास गरेको हो । सुरुमा अप्वाइन्ट लिन चाहनेहरु र पछिको अप्वाइन्टमेन्ट अगाडि सार्न चाहनेहरुलाई पनि यो अवशर प्रदान गरिएको छ ।
बेलाबेलामा सुपर सन्डे कार्यक्रम अन्तरगत बेलाबेलामा विदाका दिन आइतबार समेत अमेरिकी दूतावास काठमाडौंले भिसाका लागि अन्तरवार्ता लिदै आएको छ । यसैबीच दशैं र तिहारपछिका बिहिबार र शुक्रबार पनि भिसा अन्तरवार्ताका लागि दूतावास खुला रहने भएको छ । उक्त दिनका लागि भिसा अप्वाइन्टहरु उपलब्ध हुनेछन् ।
दूतावासले भनेको छ – ‘तपाईलाई अझ राम्रो सेवा दिनको लागि हामी दशैं र तिहारको हप्ताहरूमा खुला रहनेछौं । अक्टोबर २६ र २७ तथा नोभेम्बर १६ र १७ मा अप्वाइन्टमेन्टहरु उपलब्ध हुनेछन्।’