असाधारण योग्यताको ग्रिनकार्ड ईबी वानका लागि चाहिने प्रमाणबारे युएससीआईएसबाट अपडेट
प्रकाशित मिति : भाद्र २६, २०८० मंगलबार
असाधारण योग्यताको ग्रिनकार्ड ईबी वानका लागि चाहिने प्रमाणबारे युएससीआईएसले सेप्टेमबर १२ देखि लागु हुनेगरी नीति निर्देशिका अपडेट गरेको छ । रोजगारमा आधारित अध्यागमन भिसा वर्गीकरणका लागि योग्यता निर्धारण गर्न युएससीआईएसले असाधारण क्षमता ई ११ र उत्कृष्ट प्रोफेसर वा शोधकर्ता ई १२ का लागि चाहिने प्रमाणका प्रकारहरू स्पष्ट गर्न नीति निर्देशिका अपडेट गरको हो ।
अपडेटले विज्ञान, प्रविधि, इन्जिनियरिङ वा गणितका क्षेत्रलाई प्राथमिकता दिदै सान्दर्भिक प्रमाणका उदाहरणहरू वर्णन गर्ने स्पष्ट मार्गदर्शन थपेको छ । यसले प्रमाणहरूको मूल्याङ्कनका लागि सहज हुने तथा लाभार्थीको योग्यता स्थापित गर्न उपयुक्त प्रमाण पेश गर्न समेत आवेदकलाई सहज हुने युएससीआईएसको अपेक्षा रहेको छ ।
अधिकारीहरूले असाधारण क्षमता ई ११ र उत्कृष्ट प्रोफेसर वा शोधकर्ता ई १२ को लागि योग्यता निर्धारण गर्न प्रमाणहरूको समग्रता कसरी मूल्याङ्कन गर्छन् भन्नेबारे स्पष्ट पार्दै अधिकारीहरूले विचार गर्न सक्ने सकारात्मक कारकहरूको उदाहरणहरू समेत समावेश गरिएको छ ।
विज्ञान, कला, शिक्षा, व्यवसाय, वा एथलेटिक्समा असाधारण क्षमता भएका व्यक्तिहरूले पहिलो श्रेणीको आप्रवासी भिसा आवेदन आफैले पनि दिन सक्छन् । त्यसका लागि जागिरको अफर वा अमेरिकी श्रम विभागबाट लेबर सर्टिफिशेन आवश्यक पर्दैन ।
त्यस्तै निजी रोजगारदाता, विश्वविद्यालय, उच्च शिक्षा संस्था, लगायतका रोजगारदाताले अन्तर्राष्ट्रिय स्तरमा विशिष्ट र उत्कृष्ट रूपमा मान्यता प्राप्त प्रोफेसर वा अनुसन्धानकर्ताको लागी ई १२ श्रेणीमा आवेदन गर्न सक्छन् । असाधारण क्षमताका गैरआप्रवासीहरूका लागि ओ वान ए श्रेणीको पहिले जारी गरिएको गैरआप्रवासी मार्गनिर्देशन जस्तै नयाँ अपडेटमा पनि थप विस्तृत मार्गदर्शन र उदाहरणहरू समावेश गरिएको छ ।
नीति निर्देशिकामा असाधारण योग्यताको ग्रिनकार्डका लागि अवार्ड कस्तो चाहिने, सम्बन्धित संस्थाको सदस्यता कस्तो चाहिने, आवेदकको बारेमा प्रकाशित सामाग्रीहरु कस्तो चाहिने लगायत १० वटै प्रकारका मापदण्डबारे विस्तारमा व्याख्या गरिएको छ । उक्त अपडेट विस्तारमा पढ्न यहाँ क्लीक गर्नुहोला ।
त्यस्तै उत्कृष्ट प्रोफेसर वा शोधकर्ताका सन्दर्भमा आवश्यक ६ वटा मापदण्डबारे पनि विस्तारमा उदाहरणसहित व्याख्या गरिएको छ । उक्त अपडेट विस्तारमा पढ्न यहाँ क्लीक गर्नुहोला ।
