कागजपत्रविहिनलाई अमेरिकी कानुनको लुपहोल प्रयोग गर्न उक्साउने टिकटकर आइसबाट पक्राउ
प्रकाशित मिति : चैत्र १८, २०८० आईतबार
कागजपत्रविहिन आप्रवासीलाई अमेरिकी कानुनको लुपहोल प्रयोग गर्न उक्साउने टिकटकरलाई अमेरिकी अध्यागमन एजेन्सी आइसले पक्राउ गरेको छ । भेनेजुएलाका ती आप्रवासी ओहायोबाट पक्राउ परेका छन् । उनले अमेरिकामा अन्य कागजपत्रविहिन आप्रवासीहरूलाई कसरी मानिसहरूको घर कब्जा गर्न सकिन्छ भन्दै उक्साएको भिडियो टिकटकबाट भाइरल भएको थियो ।
लियोनेल मोरेनो नामका ती व्यक्तिलाई आइसको डेट्रोइट फिल्ड अफिसले गिरफ्तार गरेको थियो । उनलाई संघीय हिरासतमा राखिएको छ । उनलाई शुक्रबार ओहायोको कोलम्बसमा एजेन्सीको टोलीले समातेको थियो। आइसले उनलाई पक्राउ गरेर थप अध्यागमन कारवाहीको प्रकृयाका लागि हिरासतमा राखिएको बताएको छ ।
मोरेनो अवैध रूपमा अमेरिकामा अप्रिल २३, २०२२ मा प्रवेश गरेका थिए । सीमा गस्तीले उनलाई अल्टरनेटिभ टु डिटेन्सन अर्थात एटीडी कार्यक्रममा राखेको थियो । तर उनी आफ्नो गन्तव्यमा आइपुगेको ६० दिन भित्र आइस कार्यालयमा रिपोर्ट नगरी फरार भएका थिए।
मोरेनोले पहिले उनको परिवारले सरकारी सुविधा अन्तरगत हप्तामा ३५० डलर प्राप्त गरिरहेको बताएका थिए । त्यस्तै टिकटकमा भिडियो बनाएर टिकटकरका रुपमा उनले हरेक दिन १ हजार डलरभन्दा बढी कमाएको दावी गरेका थिए । ५ लाख भन्दा बढी फलोअर भएको उनको टिकटक एकाउन्ट यस हप्ताको सुरुमा निष्क्रिय भएको थियो, तर इन्स्टाग्राममा उनको उपस्थिति कायमै छ।
मोरेनोले टिकटकमार्फत परित्याग गरिएका घरहरूलाई कसरी सुकुम्बासीको अधिकार प्रयोग गरेर कब्जा गर्ने भन्नेबारे सिकाएका थिए । त्यसपछि तिनीहरूलाई नाफाको लागि बेच्नेबारे उनले भिडियो बताएका थिए । उनका केही अफ्रिकी साथीहरूले यसरी अमेरिकामा पहिले नै सातवटा घरहरू लिएको उनले बताएका थिए ।
टिकटक भिडियोमा उनले अमेरिकाको एउटा घर कब्जा गर्ने बारे सोचेको तथा कोही नबस्ने घर सुकुम्बासीले कब्जा गर्न सक्ने कानुन भएको आफूले थाहा पाएको बताएका थिए । उनले काम गरेर जीविकोपार्जन गर्नेहरुको पनि खिल्ली उडाएका थिए ।