न्युयोर्क सिटीको ट्रेन स्टेशनमा २३ बर्षका व्यक्तिलाई ज्यूदै जलाउन खोज्ने ४८ बर्षीय पक्राउ
प्रकाशित मिति : जेष्ठ १२, २०८१ शनिबार
शनिबार दिउँसो न्युयोर्क सिटीको ट्रेन स्टेशनमा एकजना २३ बर्षका व्यक्तिमाथि प्रज्वलनशील पदार्थ खन्याएर आगो लगाउने व्यक्तिलाई प्रहरीले पक्राउ गरेको छ । २३ बर्षका व्यक्तिमाथि प्रज्वलनशील पदार्थ खन्याएर आगो लगाएपछि ४८ बर्षीय आक्रमणकारी भाग्ने प्रयास गरेको जनाइएको छ ।
घटना ह्युस्टन स्ट्रीट नम्बर १ सबवे स्टेशनमा दिउँसो २ः४७ मा भएको थियो। प्रहरीका अनुसार ४८ वर्षीय पुरुष आक्रमणकारीले ट्रेनस्टेशनमा २३ वर्षीय पीडितमाथि प्रज्वलनशील पदार्थ फ्याँकेकेर आगो लगाएपछि पीडितको शरीरको केही भाग जलेको छ ।
आक्रमणकारीले कपमा बोकेको प्रज्वलनशील पदार्थ पीडितमाथि फ्याकेको जनाइएको छ । पीडितको शरीरको माथिल्लो भागमा आगो लागेको छ । प्यारामेडिकहरूले पीडितलाई उपचारको लागि स्थानीय अस्पतालमा लगेका थिए ।
प्रज्वलनशील पदार्थले पीडितको शर्टमा सल्किएको र पीडित पुरुषको छाला जलेको प्रहरीले जनाएको छ। उनलाई कति चोट लागेको छ भन्ने अहिलेसम्म प्रष्ट पारिएको छैन ।
आक्रमणकारीले पैदलै भाग्न खोजेको थियो । सोही क्रममा एक महिलासँग ठोक्किएपछि महिलाको फोन खसेको थियो । आक्रमणकारी ती महिलाको समेत फोन टिपेर आफूसँगै लगेको भागेको थियो ।
महिलाको फोनमा रहेको फाइन्ड माई आईफोन फिचर प्रयोग गरेर आक्रमणकारीलाई क्यानल स्ट्रिट र रेनविक स्ट्रिट नजिकै पक्राउ गरिएको थियो ।
घटनाको अनुसन्धानका क्रममा रेल सेवा केहीबेर ढिलो भएको थियो । घटनाबारे थप अनुसन्धान भइरहेको जनाइएको छ ।
