मेरिल्याण्डमा गाडीको ठक्करबाट ७३ बर्षीय ओमबहादुर श्रेष्ठको मृत्यु, सोमबार अन्त्येष्टी गरिने
प्रकाशित मिति : जेष्ठ २०, २०८१ आईतबार
![](https://i0.wp.com/www.khasokhas.com/wp-content/uploads/2024/06/Om-bahadur-shrestha.jpg?fit=800%2C677&ssl=1)
मेरिल्याण्डमा शुक्रबार कारको ठक्करबाट ७३ वर्षीय नेपाली अमेरिकन ओमबहादुर श्रेष्ठको मृत्यु भएको छ । लगभग ८ बजेर ४० मिनेटमा बेलायर रोड र पेन एभिन्यूमा बाटो पार गर्न खोजिरहेका बेला उनलाई गाडीले ठक्कर दिएको थियो।
श्रेष्ठलाई उपचारका लागि अस्पताल लैजाँदै गर्दा मृत्यु भएको जनाइएको छ । ठक्कर दिने निसान गाडीका चालक घटनास्थलमा नै रहेका थिए । यसैबीच मेरिल्याण्डका डेलिगेट ह्यारी भण्डारीको कार्यालय वक्तव्य जारी गर्दै गाडीको ठक्करबाट ओमबहादुर श्रेष्ठको दुःखद निधन भएको जनाएको छ ।
डेलिगेट ह्यारी भण्डारीले यस दुःखद घडीमा श्रेष्ठ परिवार र सम्पूर्ण नेपाली अमेरिकी समुदायमा हार्दिक समवेदना प्रकट गरेका छन् । श्रेष्ठ समुदायका प्रिय सदस्य रहेको उल्लेख गर्दै भण्डारीले आफ्नो कार्यालय श्रेष्ठको परिवारका साथमा रहेको बताएका छन् । घटनालगत्तै भण्डारीले शोकसन्तप्त परिवारको घरमा पुगेर समवेदना र सहानुभूति प्रकट गरेका थिए ।
श्रेष्ठका श्रीमती, चार छोरा, नौ नातिनातिना र छ पनातिपनातिना छन् । उनका तीन छोराहरू आफ्नो परिवारसँग पेरी हलमा बस्छन्। डेलिगेट भण्डारीको कार्यालयले अन्त्येष्टि प्रबन्धमा सहयोग गर्न र आवश्यक सहयोग प्रदान गर्न सक्रिय रूपमा काम गरिरहेको जनाएको छ।
श्रेष्ठको अन्त्येष्टि जुन ३ सोमबार १२०१ डन्डाल्क एभिन्युमा रहेको फ्युनरल होममा गरिने भएको छ । अन्तिम बिदाईमा सहभागी हुन चाहनेहरुलाई विहान साढे ८ बजे उपस्थीत हुन सुचित गरिएको छ ।