के ट्रम्पले अमेरिकामा स्नातक गर्नेलाई सिधै ग्रिनकार्ड दिने वाचा गरेका छन् ?
प्रकाशित मिति : असार १२, २०८१ बुधबार
पूर्व राष्ट्रपति डोनाल्ड ट्रम्पले अमेरिकामा स्नातक गर्नेलाई सिधै ग्रिनकार्ड दिने वाचा गरेको विषय अहिले अमेरिकी राजनीतिमा चर्चामा रहेको छ । ट्रम्पले गत हप्ताले दशकौंमा अमेरिकी अध्यागमनको सबैभन्दा महत्त्वपूर्ण विस्तार मध्ये एकको बारेमा उल्लेख गरेको विषयले यतिबेला अमेरिकी समाचारमाध्यमहरुमा हेडलाइन पाइरहेको छ । एउटा पोडकास्टमा बोल्दै ट्रम्पले अमेरिकी कलेजबाट स्नातक गर्नेहरुलाई स्वत ग्रीन कार्ड दिनको लागि आफ्नो समर्थन घोषणा गरेका थिए ।
विदेशीहरूका लागि अमेरिकी ग्रीन कार्ड प्राप्त गर्नु लोभलाग्दो सपना रहेको बखत नोभेम्बरको राष्ट्रपति चुनावको दौडमा रहेका ट्रम्पले यो बारेमा कुरा उठाएर धेरैका लागि जाधुको छडी चलाएका छन् । अमेरिकामा स्नातक गरेका विदेशी विद्यार्थीहरूलाई स्वतः ग्रीन कार्ड दिइने उनको भनाईले ग्रिनकार्ड चाहनेहरुमा नयाँ आशाको संचार गरेको छ । यद्यपी राजनीतिज्ञहरूले के भन्छन् भन्ने कुरामा भन्दा के गर्छन् भन्नेमा बढी ध्यान दिने हो भने ट्रम्पको यो भनाई अहिले नै पूरै पत्याउन भने नसकिने राजनीतिक विश्लेषकहरु बताउँछन् ।
पोडकाष्टमा पूर्व राष्ट्रपति ट्रम्पले भनेका थिए -‘म तपाईलाई यो बताउन चाहन्छु कि हामीले हार्वर्ड, एमआईटी, ठूला विद्यालयहरू र अभूतपूर्व विद्यालयहरूमा पढेका मानिसहरू गुमाउनु पर्दा धेरै दुःख लाग्छ। तर म के गर्न चाहन्छु, र म के गर्छु भने तपाई कलेजबाट स्नातक हुनुहुन्छ, मलाई लाग्छ तपाइँले तपाइँको डिप्लोमाको एक भागको रूपमा अमेरिकामा रहन सक्षम हुनको लागी ग्रीन कार्ड स्वतः प्राप्त गर्नुपर्छ।’
ट्रम्पले पोडकास्टमा अझ अगाडी भनेका थिए – ‘मलाई शीर्ष कलेज वा कलेजबाट स्नातक भएर अमेरिकामा बस्न चाहेकाहरुको कथा थाहा छ । तिनीहरूसँग कम्पनीको लागि योजना थियो, एक अवधारणा थियो । तर तिनीहरू यहाँ बस्न सक्दैनन्। उनीहरु भारत फर्किन्छन् । उनीहरु चीन फर्किन्छन् । तिनीहरू ती ठाउँहरूमा फर्केर एउटै आधारभूत कम्पनी स्थापना गर्छन् । तिनीहरू हजारौं मानिसहरूलाई रोजगारी दिएर अरबपतिहरू बन्छन् । जुन यहाँ गर्न सकिन्थ्यो।’
यो सुन्दा निकै राम्रो कुरा हो । तर, जब ट्रम्प राष्ट्रपति थिए, ट्रम्पले यो समस्यालाई झनै बढाएका थिए । उनले दक्ष कानूनी अध्यागमनलाई थप प्रतिबन्धित गर्ने नीतिहरू लागू गरेका थिए । अन्तर्राष्ट्रिय कामदारहरू र विद्यार्थीहरूको जीवनलाई अझ अप्ठ्यारो बनाएका थिए । नयाँ दक्ष कामदार भिसाका लागि अस्वीकार दरहरू ट्रम्पको शासनकालमा झण्डै चार गुणा बढेको थियो ।
ट्रम्पले अमेरिकामा स्नातक गरेकाहरुलाई ग्रिनकार्ड दिनुपर्ने बताएलगत्तै केही रिपब्लिकनहरूको आक्रोश आएको थियो । त्यसपछि उनले एक स्पष्टीकरण जारी गरेका थिए । प्रस्तावित कार्यक्रममा कडा जाँच प्रक्रिया समावेश हुने ट्रम्पको अभियानका एकजना प्रवक्ताले बताएका थिए । यो केवल अमेरिकी ज्याला वा कामदारहरूलाई नघटाउने सबैभन्दा राम्ररी जाँच गरिएको कलेज स्नातकहरूमा लागू हुने उनले बताएका थिए ।
कलेजबाट स्नातक गरेपछि आप्रवासीहरूलाई स्वचालित रूपमा ग्रीन कार्ड दिने वाचा ट्रम्पको अभियानले फिर्ता लिएको छ। राष्ट्रपति ट्रम्पले आफ्नो नयाँ प्रशासनको पहिलो दिनमा सीमा बन्द गर्ने र इतिहासकै सबैभन्दा ठूलो गैरकानूनी विदेशीहरूलाई देश निकाला गर्ने प्रयास सुरु गर्ने कुरा स्पष्ट गरिसकेका ट्रम्पको अभियानका राष्ट्रिय प्रेस सचिवले एक विज्ञप्तिमा बताएका छन् । ट्रम्पले कडा जाँच प्रक्रिया समावेश गर्ने र सबै कम्युनिस्ट, कट्टरपन्थी इस्लामवादी, हमास समर्थक, अमेरिका घृणा गर्ने र पब्लिक चार्ज हुनेहरुलाई ग्रिनकार्डका लागि अयोग्य बनाउने उनको भनाई छ ।