विनाभिसा अमेरिका छिर्नखोज्नेको संख्या ३ बर्षकै कम, दैनिक १५ सयमा झरेमा प्रतिबन्ध हट्ने
प्रकाशित मिति : श्रावण ८, २०८१ मंगलबार
विनाभिसा गैरकानूनी रूपमा अमेरिकाको दक्षिणी सीमा पार गर्ने आप्रवासीको संख्या जुलाईमा उल्लेखनीय रूपमा घटेको छ । अब यो संख्या राष्ट्रपति बाइडेनले लागु गरेको नियम अन्तरगत सिमानाका खुलाउनका लागि अधिकारीहरूलाई आवश्यक पर्ने थ्रेसहोल्डको नजिक पुगको जनाइएको छ ।
अमेरिकी र मेक्सिको सीमामा विनभिसा अमेरिका आउन खोज्ने आप्रवासीहरुको पक्राउमा लगातार पाँचौं मासिक गिरावट आएको र ट्रम्प प्रशासनको बेलाको २०२० को बर्षा यता त्यहाँ अवैध आप्रवासनमा सबैभन्दा कमी आएको तथ्यांकले देखाएको छ । बाइडेनको आदेशपछि गैरकानुनी सीमा पार गर्ने क्रम जुन महिनामा तीन वर्षमा सबैभन्दा न्यून स्तरमा पुगेको हो ।
जुनको सुरुमा राष्ट्रपति बाइडेनले गैरकानूनी रूपमा अमेरिका प्रवेश गर्ने अधिकांश आप्रवासीहरूको प्रवेश निलम्बन गर्न आफ्नो अख्तियारलाई प्रयोग गरेका थिए । जसले प्रवेशका आधिकारिक पोर्टहरु बाहिर अमेरिकी शरण प्रणालीमा पहुँचलाई प्रभावकारी रूपमा बन्द गरेको थियो ।
बाइडेनको घोषणा कार्यान्वयन गर्ने नियम अन्तरगत विनाभिसा अमेरिका प्रवेश गर्न खोज्ने आप्रवासीको संख्या लगातार ७ दिनसम्म दिनको औसत १५ सयमा झरेमा एसाइलममाथिको कारवाही हटाइने प्रावधान रहेको छ । गतहप्ता दैनिक अवैध क्रसिङहरूको औसत लगभग १६५० मा झरेको थियो ।
यो गणनामा मेक्सिकोबाहेकका अन्य देशका अभिभावकविनाका बच्चाहरू समावेश गरिदैन । ती बालबालिकाहरूलाई १८ वर्षको नभएसम्म अमेरिकामा रहेको प्रायोजकसँग वा सरकारी आश्रयमा राखिन्छ।
यदि दैनिक अवैध क्रसिङको ७ दिनको औसत १५ सयमा झरेमा बाइडेनको सिमा प्रतिबन्ध रोकिनेछ । तर त्यसका लागि होमल्यान्ड सेक्युरिटी सेक्रेटरी अलेहान्द्रो मेयोर्कासले थ्रेसहोल्डमा पुग्ने बारे तथ्यगत निर्धारण गर्नुपर्छ । तर सात दिनको औषत २५ सय नाघेमा प्रतिबन्ध पुन लाग्नेछ ।