अमेरिकी सरकार शटडाउन हुनबाट रोक्ने बिल प्रतिनिधिसभाबाट पारित गर्ने तयारी
प्रकाशित मिति : आश्विन ९, २०८१ बुधबार
बुधबार अमेरिकाको प्रतिनिधि सभाले सरकार शटडाउन हुनबाट रोक्नका लागि विधेयक पारित गर्ने तयारी गरिरहेको छ । जसमा डोनाल्ड ट्रम्पले माग गरेको एउटा प्रस्ताव हटाइएको छ। उक्त प्रस्तावले अमेरिकाभरिका नागरिकहरुलाई मतदान दर्ता गर्नको लागि नागरिकताको प्रमाण पेश गर्नुपर्ने आवश्यकता राखेको थियो।
प्रतिनिधि सभाका रिपब्लिकन नेताहरू आन्तरिक मतभेदको सामना गर्दै उक्त विधेयक पारित गर्न डेमोक्र्याटको मतमा धेरै निर्भर रहने योजना बनाएका छन्। यदि यो पारित भएमा सिनेटमा जानेछ, जहाँ यो छिटो अनुमोदन हुने अपेक्षा गरिएको छ । दुवै सदन यसै हप्ता लामो समयका लागि स्थगित हुने तयारीमा छन्, नोभेम्बर ५ को चुनावपछि मात्र सदन सुचारु हुनेछ ।
यस प्याकेजबारे सभामुख माइक जोनसन र शीर्ष डेमोक्र्याटहरूबीच वार्ता गरिएको थियो, जसले आगामी डिसेम्बर २० सम्म सरकारलाई वर्तमान स्तरमा वित्तीय सहायता प्रदान गर्नेछ । यसमा सेक्रेट सर्भिसका लागि २३१ मिलियन थप रकम पनि समावेश गरिएको छ । ट्रम्पलाई मार्न खोजिएको दुई प्रयासपछि यो रकम विशेष गरी राष्ट्रपतीय चुनाव अभियानसँग सम्बन्धित गतिविधिहरूको लागि हो ।
ट्रम्पले सार्वजनिक रूपमा रिपब्लिकन सांसदहरूलाई मतदानका लागि दर्ता गर्न नागरिकताको प्रमाणपत्र पेश गर्नुपर्ने कानुन नल्याएसम्म सरकार शटडाउन गराउन आदेश दिएका छन् । यदि सेप्टेम्बरको अन्तिमसम्म खर्च विधेयक पारित नभएमा अक्टोबर १ देखि अमेरिकी सरकार शटडाउन हुनेछ ।