लामो समयदेखि नेपाली पत्रकारिता क्षेत्रमा सक्रिय रजेन्द्र केसीको अमेरिकाको केन्टकीमा निधन
प्रकाशित मिति : कार्तिक १७, २०८१ शनिबार
अमेरिकाको केन्टकीमा क्यान्सरसँग जुध्दै आएका पत्रकार रजेन्द्र केसीको निधन भएको छ । लामो समयदेखि पत्रकारिता क्षेत्रमा सक्रिय केसी केही समयदेखि अमेरिकामा मेटास्टेटिक मेलिग्नेनछ प्यान्क्रियाटिक क्यान्सरसँग जुध्दै आएका थिए ।
करिब ४ महिनाअघि मात्र केसीको जीवनमा यो अप्रत्याशित अवस्था आएको थियो । केसीको उपचारका क्रममा निधन भएको जनाइएको छ ।
नेपालका राजधानी दैनिक, अन्नपुर्ण पोष्ट लगायतका राष्ट्रिय संचारमाध्यमहरुमा फोटोपत्रकारका रुपमा काम गरेका उनी फोटो जर्नालिष्ट क्लब नेपालका पूर्व कोषाध्यक्ष थिए भने नेपाल पत्रकार महासंघका प्रदेश समितिका सदस्य समेत थिए ।
केसीको उपचारमा केमोथेरापी गर्नुपर्ने अवस्था आएको थियो । नेपालबाट ६ वर्षअघि अमेरिका आएका केसीसँग श्रीमती र एक छोरी छन् । केसीको प्रतिकूल स्वास्थ्य अवस्थाका कारण आम्दानीको स्रोत बन्द भएको थियो भने हालसम्मको बचत पनि उपचारकै क्रममा सकिएकाले गोफण्डमी समेत संचालन गरिएको थियो ।
केसीको उपचारका क्रममा श्रीमती साथमै रहने र छोरीको हेरचाह गर्नुपर्ने अवस्था थियो । परिवारका कुनै सदस्यले काम गर्न नसक्दा आर्थिक अवस्था कमजोर रहेको छ । साथै मासिक किस्तालगायत अन्य विविध खर्चको अभावका कारण केसी परिवारको मानसिक रुपमा समेत अत्यन्तै चिन्तित अवस्थामा पुगेको थियो ।
अब केसीको निधनले परिवारमा बज्रपात भएको छ । केसी नेपाल अमेरिका पत्रकार संघ नेजाका साधारण सदस्य एवं सदस्यता छानबिन तथा सिफारिस समितिका सदस्य समेत रहेका थिए ।
उनको निधनपछि उनका साथीहरु र पत्रकारिता क्षेत्रका व्यक्तिहरुले सामाजिक संजालमा श्रद्धाञ्जली व्यक्त गरिरहेका छन् । रोविन क्षेत्रीले लेखेका छन् – ‘म अझै पत्याउन सक्दिन। तर मलाई थाहा छ तपाईंले पहिले नै अलविदा भन्नुभएको छ, म यसलाई स्वीकार गर्नेछु किनकि तपाईंले त्यो भन्नुभएको छ। आज बिहान तपाई हामीसँग हुनुहुन्न भनेर सुनेर म स्तब्ध भएँ । हामीले हिजो मात्रै तपाई कसरी राम्रो गरिरहनुभएको छ र राम्रोसँग निको भइरहनुभएको छ भनेर कुरा गरेका थियौं। तपाईलाई सधैं मिस गरिनेछ। सधैं सम्झिनेछ। तपाई कुशल मानव हुनुहुन्थयो । तपाई मेरो मुटुमा सधैंभरि रहनु हुनेछ ।’
दुईदिन अगाडिमात्र अल्बर्ट बी चान्डलर अस्पतालबाट केसीले सामाजिक सञ्जालमा पोष्ट गर्दै सबैलाई तिहार, छठ र नेपाल सम्बतको शुभकामना दिएका थिए भने २ बर्ष अगाडि मनाएको तिहारको फोटो पनि पुन शेयर गरेका थिए ।
फोटो पत्रकार श्रीधर पौडेलले सामाजिक संजालमा श्रद्धाञ्जली व्यक्त गर्दै लेखेका छन् – ‘दाई एउटा असल साथी अनी अबभिभावक गुमाए तॅलाई धेरै याद हरु छोडेर गईस, हार्दिक श्रद्धाञ्जली दाई ।’