अमेरिकी संसदको दुबै संसदमा रिपब्लिकनको नियन्त्रण, ट्रम्प शक्तिशाली राष्ट्रपति बन्ने
प्रकाशित मिति : कार्तिक २९, २०८१ बिहीबार
बुधबार रिपब्लिकनहरूले एरिजोना र क्यालिफोर्नियामा महत्वपूर्ण सिटहरू जितेपछि र प्रमुख ब्याटलग्राउण्ड क्षेत्रहरूमा डेमोक्र्याट्सलाई पराजित गरेपछि प्रतिनिधि सभामा पनि नियन्त्रण कायम गरेका छन् । यसले वाशिंगटनमा राष्ट्रपति निर्वाचित डोनाल्ड ट्रम्पको एजेन्डालाई कार्यान्वयन गर्नका लागि रिपब्लिकनलाई स्पष्ट मार्ग प्रदान गरेको छ।
तर प्रतिनिधि सभामा रिपब्लिकनहरूको बहुमतको फरक अझै स्पष्ट छैन । प्रारम्भिक गणनाहरूले उनीहरूले डेमोक्र्याट्समाथि सानो अग्रता मात्रै राख्ने सम्भावना देखाएको छ। पश्चिमी क्षेत्रका केही महत्वपूर्ण प्रतिस्पर्धाहरूमा मत गणना अझै जारी छ । केही अन्य प्रतिस्पर्धाहरूमा पनि परिणामका नजिक छन् ।
रिपब्लिकनहरूको देशव्यापी लहर वर्तमान बाइडेन प्रशासनप्रति असन्तुष्टिका रूपमा देखा परेको छ । जसमा धेरै डेमोक्र्याटिक प्रतिनिधिहरू र पार्टीका उम्मेदवारहरूले राष्ट्रपति उम्मेदबार कमला ह्यारिसको प्रदर्शनलाई उछिन्न सकेनन् ।
डेमोक्र्याटहरूले सबैभन्दा ठूलो हार पेनसिल्भेनियामा व्यहोरेका छन् । ट्रम्प समर्थक क्षेत्रहरूमा आफ्नो सिट जोगाउँदै केही डेमोक्र्याटिक प्रतिनिधिहरूले अपेक्षाभन्दा राम्रो प्रदर्शन गरे र रिपब्लिकनहरूले आशा गरेका केही सिट जित्नबाट रोकिदिए।
तर, देशव्यापी रूपमा डेमोक्र्याटिक प्रतिस्पर्धीहरू धेरैजसो प्रतिस्पर्धामा पराजित भए। जसले गर्दा डेमोक्र्याटहरूले बहुमतको लागि आवश्यक २१८ सिट कायम गर्न सकेनन्। अमेरिकाको माथिल्लो सदन सिनेटमा पनि रिपब्लिकन पार्टीकै नियन्त्रण कायम भइसकेको छ । रिपब्लिकनले आफ्नो लक्षित संख्यामा प्रतिस्पर्धी सिट जितेका छन् र सिनेटमा आफ्नो नियन्त्रण सुरक्षित गरेका छन्। १०० सिटको सिनेटमा नियन्त्रण कायम गर्नका लागि कम्तीमा ५१ सिटमा जित हासिल गर्नुपर्छ तर रिपब्लिकनहरुले ५२ सिटमा जित हासिल गरेका छन् । अब रिपब्लिकनहरुलाई संसदबाट साधारण बहुमतले पारित हुने कुनै पनि बिलहरु पारित गराउन कुनै समस्या हुनेछैन ।
यस अगाडि सिनेटमा डेमोक्र्या्टसको नियन्त्रण कायम रहेको थियो । बाइडेन निर्वाचित भएपछिको ११७ औं संसदमा सिनेट पचास पचास सिटमा विभाजित थियो । यो अवस्थामा निर्णायक मत अमेरिकी उपराष्ट्रपतिले दिन पाउने प्रावधान भएका कारण डेमोक्र्याट्सले नै नियन्त्रण कायम गरेका थिए । त्यस्तै २०२३ जनवरीदेखि २०२५ जनवरीसम्मको ११८ औं संसदमा सिनेटमा डेमोक्र्याटसको ५१ र रिपब्लिकनको ४९ सिट कायम भएकाले डेमोक्र्याटस्कै नियन्त्रण कायम थियो । तर राष्ट्रपतिमा पराजयसँगै योपटक डेमोक्र्याटसहरुले सिनेटमा पनि नियन्त्रण गुमाएका छन् ।
यद्यपी विगतमा डोनाल्ड ट्रम्प राष्ट्रपति भएकै बखत पनि सिनेटमा रिपब्लिकनकै नियन्त्रण कायम थियो । २०१७ देखि २०१९ सम्मको शत्रमा रिपब्लिकनको ५१ सिट र २०१९ देखि २०२१ सम्मको शत्रमा रिपब्लिकनको ५३ सिट कायम थियो । २०१७ देखि २०१९ सम्म सिनेटमा रिपब्लिकनको बहुमत हुँदा प्रतिनिधिसभामा पनि रिपब्लिकनहरुकै बहुमत थियो । त्यो बेला डोनाल्ड ट्रम्पले आफूले चाहेका साधारण बहुमतबाट पारित हुने बिलहरु दुबै सदनबाट पारित गराउनसक्ने शक्ति राख्थे । तर २०१९ देखि २०२१ सम्म पनि प्रतिनिधिसभामा रिपबिलकनले नियन्त्रण गुमाएर डेमोक्र्याटसहरुले बहुमत कायम गरेका थिए । प्रतिनिधिसभामा नियन्त्रण कायम गर्नका लागि कम्तीमा २१८ सिट जित्न आवश्यक छ ।
जो बाइडेनको कार्यकालमा ११६ औं संसदमा प्रतिनिधिसभा र सिनेट दुबैमा डेमोक्र्याटसको नियन्त्रण कायम थियो । बाइडेनले आफूले चाहेका साधारण बहुमतबाट पारित हुने बिलहरु दुबै सदनबाट पारित गराउनसक्ने शक्ति राख्थे । तर २०२३ देखि २०२५ सम्मको ११७ औं ससदमा भने प्रतिनिधिसभामा डेमोक्र्याटसले नियन्त्रण गुमायो । र रिपब्लिकनले नियन्त्रण कायम गर्न पुग्यो ।
अब डोनाल्ड ट्रम्प अमेरिकाको शक्तिशाली राष्ट्रपति बन्नेछन् । अर्थात् उनले चाहेका साधारण बहुमतले पारित हुनसक्ने बिलहरु संसदका दुबै सदनबाट पारित गराउन रिपब्लिकनलाई कुनै अप्ठ्यारो हुनेछैन । तर कैयन महत्वपूर्ण बिलहरु रिपब्लिकन र डेमोक्र्याट्स दुबैले संसदका दुबै सदनमा आफ्नो नियन्त्रण कायम भएको अवस्थामा नभई एउटा सदनमा नियन्त्रण गुमेको अवस्थामा मात्र ल्याउने गरेका छन्, जसका कारण त्यस्ता बिलहरु पारित हुनबाट रोकिने गरेका छन् ।