न्युयोर्क सिटीमा एकाविहानै श्रृंखलावद्ध छुरा प्रहार, २ जनाको मृत्यु, १ जना घाइते, संदीग्ध पक्राउ
प्रकाशित मिति : मंसिर ३, २०८१ सोमबार
सोमबार बिहान न्युयोर्कको म्यानह्याटनमा एक व्यक्तिले तीनजनालाई छुरा प्रहार गरेको प्रहरीले बताएको छ । आक्रमणकारीले छुरा प्रहारबाट दुईजनाको हत्या गरेको र तेस्रोलाई गम्भीर घाइते बनाएको जनाइएको छ।
घटनामा आक्रमणकारीले पीडितहरूलाई केही नभनी एक्कासी छुरा हानेको अधिकारीहरुले बताएका छन् । ५१ वर्षका शंकास्पद व्यक्तिलाई प्रहरी नियन्त्रणमा लिइएको छ। उनलाई रक्ताम्मे लुगा र दुईवटा भान्सामा प्रयोग हुने चक्कूसहित पक्राउ गरिएको हो। शंकास्पद व्यक्ति र पीडितहरूको नाम तत्काल खुलासा गरिएको छैन। तीन जना न्युयोर्कवासमाथि भएको एकतर्फी आक्रमणले यस्तो घटना कसरी हुन सक्छ भनेर सोच्न बाध्य बनाएको मेयर एरिक एडम्सले पत्रकार सम्मेलनमा बताएका छन् ।
अनुसन्धानकर्ताहरूले यो हिंसात्मक घटनाको कारण पत्ता लगाउने प्रयास गरिरहेका छन्। घटनाका क्रममा कुनै कुराकानी नभएको र कुनै लुटपाट पनि नभएको न्यूयोर्क पुलिस विभागका प्रमुख जोसेफ केनीले बताएका छन् । पहिलो आक्रमण वेष्ट १९ औं स्ट्रीटमा भएको थियो । बिहान ८ बजेर ३० मिनेटमा हडसन नदीको नजिकै आफ्नो कार्यस्थलमा उभिएका ३६ वर्षीय निर्माण मजदुरको हत्या गरिएको थियो ।
लगभग दुई घण्टापछि म्यानह्याटनको अर्को छेउमा ६८ वर्षीय व्यक्ति ईष्ट रिभरमा माछा मारिरहेका बेला ईस्ट ३० औं स्ट्रीट नजिकै उनीमाथि आक्रमण गरिएको थियो । ती दुबैजनाको मृत्यु भएको छ ।
त्यसपछि शंकास्पद व्यक्ति सम्भवतः नदी किनारामा उत्तरतिर गएको र बिहान १० बजेर ५५ मिनेटमा तिर ईस्ट ४२ औं स्ट्रीटमा संयुक्त राष्ट्रसंघ मुख्यालय नजिकै ३६ वर्षीया महिलालाई धेरै पटक छुरा प्रहार गरिएको जनाइएको छ । उनलाई गम्भीर अवस्थामा अस्पतालमा भर्ना गरिएको छ।
एकजना ट्याक्सी चालकले तेस्रो आक्रमण देखेपछि ईस्ट ४६ औं स्ट्रीट र फर्स्ट एभिन्यू नजिकैको प्रहरीलाई जानकारी दिएका थिए । केही समयपछि प्रहरी अधिकारीले संदिग्धलाई पक्राउ गरेका थिए ।
सन् २०२४ मा अहिलेसम्म न्यूयोर्क सिटीमा हत्या दर दुई वर्षमा १४ प्रतिशत घटेको छ, तर गम्भीर आक्रमणहरू लगभग १२ प्रतिशतले बढेको छ । केही सार्वजनिक स्थानमा भएका हालका छुरा आक्रमणले ध्यानाकर्षण गरेका छन्, जसमध्ये केही हप्ता अघि कोने आइल्याण्ड सबवे स्टेशनमा भएको घातक आक्रमण पनि एक उदाहरण हो।
सोमबारको हिंसामा संलग्न शंकास्पद व्यक्ति सम्भवतः होमलेस भएको जनाइएको छ । उनले केही महिनाअघि आपराधिक मामिलामा सजाय पाएका थिए र गत महिनामा ठूला चोरीको मुद्दामा पक्राउ परेका थिए ।