अमेरिकाको ८५ हजार कामदार भिसाका लागि प्रयाप्त आवेदन प्राप्त, अर्को लोटरी मार्चमा
प्रकाशित मिति : मंसिर १७, २०८१ सोमबार
युएससीआईएसले आर्थिक बर्ष २०२५ का लागि ८५ हजार कामदार भिसा एचवानबीका लागि प्रयाप्त आवेदन प्राप्त गरेको घोषणा गरेको छ । आर्थिक बर्ष २०२६ का लागि कामदार भिसाको लोटरी आगामी मार्चमा खोलिने छ ।
संसदद्वारा तोकिएको ८५ हजारको सीमा पुरा गर्न पर्याप्त आवेदनहरू प्राप्त गरेको युएससीआईएसले जनाएको छ। यसमा ६५,००० भिसाको नियमित सीमा र अमेरिकी डिग्री हासिल गरेकाहरुका लागि थप २०,००० भिसा समावेश छ ।
युएससीआईएसले आगामी केही दिनहरूमा लोटरीका लागि दर्ता गरेका र छनौट नभएका व्यक्तिहरूलाई अनलाइनमा छनौट नभएको सूचना पठाउनेछ। उनीहरु आर्थिक बर्ष २०२५ का लागि आवेदन दिन योग्य हुनेछैनन् । तर ८५ हजारको सीमा बाहेकका आवेदन भने युएससीआईएसले स्वीकार गर्न र प्रकृयामा लैजान जारी राख्नेछ ।
पहिलो रोण्डको लोटरीमा छनौट गरेका आवेदकको संख्या प्रयाप्त नभएको भन्दै युएससीआईएसले दोश्रो राउण्डको लोटरीमा १३,६०७ आवेदकहरु चयन गरेको थियो । मार्चमा पहिलो राउण्डमा ११४,००० आवेदकहरु चयन गरिएको थियो। यसरी कुल चयन भएका आवेदनकर्ताहरूको संख्या १,२७,६२४ रहेको थियो ।
लोटरीका लागिथ अनलाइन दर्ता मिति गत मार्च २५ मा समाप्त भएको थियो। आर्थिक वर्ष २०२४ को तुलनामा २०२५ का लागि आवेदनहरूको संख्या उल्लेखनीय घटेको छ। २०२५ का लागि ४७९,९५३ आवेदन प्राप्त भएको थियो, यो संख्या २०२४ मा दर्ता भएका ७८०,८८४ आवेदनहरूको तुलनामा लगभग ३९ प्रतिशत कम हो।
एचवान बी भिसा भनेको एक अस्थायी गैर आप्रवासी भिसा श्रेणी हो जसले अमेरिकी रोजगारदातालाई शिक्षित विदेशी पेशेवरहरूलाई विशेष व्यवसायमा काममा राख्न अनुमति दिन्छ, जसमा कम्तीमा स्नातक वा समान डिग्रीको आवश्यकता हुन्छ।
यो भिसा विशेष रूपमा गणित, इञ्जिनियरिङ, प्रविधि, र मेडिकल विज्ञान जस्ता क्षेत्रहरूमा लोकप्रिय छ। यो भिसाको प्रारम्भिक अवधि सामान्यतया तीन वर्षको हुन्छ, जसलाई अधिकतम छ वर्षसम्म विस्तार गर्न सकिन्छ।
