क्यालिफोर्नियाको सान डिएगोमा पर्खाल नाघेर अमेरिका छिर्न खोज्दा १ को मृत्यु, एकजना घाइते
प्रकाशित मिति : चैत्र १९, २०८१ मंगलबार
सोमबार राति क्यालिफोर्नियाको सान डिएगो नजिकै रहेको अमेरिका मेक्सिको सीमानामा रहेको पर्खालबाट खसेर एक जनाको मृत्यु भएको छ भने अर्का एक जना घाइते भएको अधिकारीहरूले पुष्टि गरेका छन्। दुबैजना गैरकानूनी रूपमा अमेरिका प्रवेश गर्ने प्रयास गर्दा खसेको जनाइएको छ ।
सीमा गस्तीका अनुसार सान डिएगो क्षेत्रका एजेन्टहरूले ३० फिटको पर्खालबाट खसेका उनीहरुलाई राति ११ बजेतिर फेला पारेका थिए । एजेन्टहरू आइपुग्दा एक जना मृत अवस्थामा भेटिएका थिए । चिकित्सा पेशेवरहरूले उनलाई मृत घोषित गरेका थिए ।
अर्को आप्रवासीलाई चोटपटकको उपचारको लागि नजिकैको अस्पताल लगिएको थियो। उनको हालको अवस्था अज्ञात रहेको छ। सीबीपीले घटनाको अनुसन्धान गरिरहेको बताएको छ।
राष्ट्रपति डोनाल्ड ट्रम्पले आफ्नो पहिलो कार्यकालमा पर्खालको ३० फिटसम्म बढाएपछि सीमाक्षेत्रको पर्खाल नाघेर अमेरिका आउन खोज्दा घाइते हुने र ज्यान गुमाउनेहरुको संख्या विगत केही वर्षहरूमा सान डिएगोको सिमानामा निरन्तर बढिरहेको छ। २०१९ मा सीमा पर्खालबाट खसेका ६० भन्दा कमको उपचार गरिएको थियो भने २०२१ मा मात्र त्यो संख्या ४५० भन्दा माथि पुगेको थियो ।
मेक्सिकन वाणिज्य दूतावासले २०२३ मा सान डिएगो क्षेत्रमा प्रवेश गर्ने प्रयास गर्दा २९ मेक्सिकन नागरिकको मृत्यु भएको र अन्य १२० जना घाइते भएको रिपोर्ट गरेको थियो । गतबर्षको मार्चमा मेक्सिको र अमेरिकालाई छुट्याउने पर्खाल चढ्ने प्रयास गर्दा सान डिएगो छेउमा खसेपछि एकै दिनमा एघार जना घाइते भएका थिए ।