सरकारी सुविधा लिने सम्भावना भएकालाई भिसा नदिन अमेरिकी सरकारको आन्तरिक निर्देशन
प्रकाशित मिति : माघ १०, २०७४ बुधबार
अमेरिकी सरकारको विदेशमन्त्रालयले अमेरिकामा कुनै पनि प्रकारको भिसामा आएर सरकारी सुविधा लिने सम्भावना भएकाहरुलाई भिसा नदिन भिसा कन्सुलर अफिसरहरुलाई निर्देशन जारी गरेको छ । अमेरिका आएर वेरोजगार बन्दै खर्चका लागि संघीय सरकारमा भर पर्ने सम्भावना भएकाहरुलाई भिसा जारी नगर्न आन्तरिक निर्देशन जारी गरिएको हो ।
अमेरिकी सरकारका तर्फबाट आवश्यक परिवारलाई प्रदान गर्ने अस्थायी सहयोग टीएएनएफ, राज्य र स्थानीय स्तरका नगद कार्यक्रमहरु, लामो समयसम्मको हेरचाहका लागि आवश्यक मेडिकेड लगायतका कार्यक्रमहरु सरकारी सुविधा अन्तरगत पर्छन् । सरकारका तर्फबाट जारी आन्तरिक निर्देशनमा आवेदकको उमेर, स्वास्थ्य, पारिवारिक अवस्था, आर्थिक अवस्था र शैक्षिक दक्षता हेरेर अमेरिकामा सरकारी सुविधा लिने सम्भावना रहेको वा नरहेको निर्धारण गर्न निर्देशन दिइएको छ ।
निर्देशन तत्काल कार्यान्वयन गर्न भनिएको छ । खासगरी पारिवारिक पिटिस लगायत आप्रवासी भिसाका सन्दर्भमा यो निर्देशन लागु हुनेछ ।