न्युयोर्कमा नेपाल डे परेड हुने
प्रकाशित मिति : जेष्ठ ४, २०७५ शुक्रबार
लामो समयदेखिको रस्साकस्सी, आरोप प्रत्यारोप र अन्यौलपछि न्युयोर्कमा नेपाल डे परेड हुने भएको छ । आगामी आइतबार न्युयोर्कमा म्यानहटनमा नेपाल डे परेड हुने भएको हो । यस अघि म्यानहटनमा सन् २०१६ र २०१७ मा दुईपटक नेपाल डे परेड भइसकेको छ ।
पार्क एभिन्यु र पाँचौं एभिन्युको बीचमा ३८ स्ट्रीटमा जम्मा भइसकेपछि दिउसो १२ बजेबाट परेड सुरु हुनेछ । परेड म्याडिसन एभिन्युमा ३८ स्ट्रीटबाट २५ स्ट्रीटसम्म हुनेछ । परेडमा सहभागी हुने र नहुने विषयमा भने न्युयोर्कको नेपाली समुदाय विभाजित रहेको छ ।
सन् २०१६ मा पहिलो नेपाल डे परेडमा हजारौं नेपालीहरु सहभागी भएका थिए । आयोजकले अपेक्षा गरेभन्दा पनि धेरै नेपालीहरु नेपाली पहिचान झल्किने पोशाक, झाँकी र झण्डासहित सहभागी भएका थिए । गतबर्षको परेडपनि खासै विवादमा परेन । तर यो बर्षभने परेड विवादमा परेको छ ।
फोटोमा सन् २०१६ को नेपाल डे परेड । फोटो : प्रदीप परियार थापा