बोक्सीको आरोपमा मारिएकी लक्ष्मीका छोराको मुटु चिरिने भिडियो बयान
प्रकाशित मिति : मंसिर २७, २०७३ सोमबार
बोक्सीको आरोपमा मलमूत्र खुवाएर निर्घात कुटपिट गरेर हत्या गरिएकी काभ्रे सानो गौथली–७ की ३३ वर्षीया लक्ष्मी नेपालीका छोरा सुमन नेपालीले मुटु चिरिने भिडियो बयान दिएका छन् ।
लक्ष्मीलाई बोक्सी आरोपमा स्थानीय शिक्षक हीरा लामाको नेतृत्वमा मंगलबार डोरीले बाँधेर मलमूत्र खुवाई निर्घात कुटपिट गरिएको थियो । कुटपिटबाट गम्भीर घाइते भएकी परियारको शुक्रबार मृत्यु भएको थियो ।
विडम्वना के छ भने सो घटनामा पीडित परियारले प्रहरी कार्यालय चौबासमा निवेदन दिए पछि प्रहरी र स्थानीयले मिलापत्र गराएका थिए ।
मिलापत्र गरेको २४ घन्टा नबित्दै पीडित महिलाको मृत्यु भएको थियो । मृत्युको मुखमा पुगेकी महिलासंग कसरी मिलापत्र गराइयो भन्ने प्रश्न पनि यहानिर उठेको छ ।
मृत्यु पश्चात् माइती पक्षले प्रहरीसमक्ष किटानी जाहेरी दिएपछि हत्याको आरोपमा जिल्ला प्रहरी कार्यालयले शिक्षक हीरा लामा र साइँला तामाङलाई पक्राउ गरेको छ भने थप अनुसन्धानका लागि भन्दै लक्ष्मीका श्रीमान् मिलन परियारलाई पनि पक्राउ गरेको थियो ।