अमेरिकी अदालतमा ४ हजार नेपालीका एसाइलम पेन्डिङ, शटडाउनबाट प्रभावित (एक्सक्लुसिभ)
प्रकाशित मिति : पुस १६, २०७५ सोमबार
अमेरिकी अध्यागमन अदालतमा ४ हजार ४९ नेपालीका एसाइलम लगायत अध्यागमन सम्बन्धित मुद्दाहरु पेन्डिङ अवस्थामा रहेको एक्जुकेटिभ अफिस फर इमिग्रेशन रिभ्युको तथ्यांकले जनाएको छ । अमेरिकी अध्यागमन अदालतमा पेन्डिङ रहेका कुल ८ लाख ९ हजार ४१ मुद्दाहरुमध्ये शुन्य दशमलव ५ प्रतिशत मुद्दाहरु नेपालीका रहेका छन् ।
खासगरी डिसेम्बर २४, २६, २७ र २८ तारिखका लागि कैयन नेपालीका एसाइलमका मुद्दाहरुको सुनुवाई तय भएकोमा सरकार शटडाउनका कारण ती मुद्दाको सुनुवाई अनिश्चितकालका लागि पछाडि सारिएको छ । त्यस्तै कम्तीमा आगामी जनवरी २, ३ र ४ का लागि तय भएका एसाइलमका मुद्दाहरु पनि सरकार शटडाउनका कारण पछि सारिने सम्भावना रहेको छ ।
अमेरिकी अध्यागमन अदालतमा रहेका नेपालीका कुल ४ हजार ४९ मुद्दामध्ये ४ हजार ९ मुद्दा एसाइलमसँग सम्बन्धित रहेका छन् । ६ मुद्दाहरु अपराधसँग सम्बन्धित रहेका छन् भने बाँकी अन्य अध्यागमन सम्बन्धित मुद्दाहरु हुन् ।
४ हजार ९ मध्ये सबैभन्दा धेरै न्युयोर्कमा २१८८ नेपालीका मुद्दाहरु पेन्डिङ अवस्थामा रहेका छन् । त्यसपछि क्यालिफोर्नियामा ९४१, टेक्सासमा ३४१, मासाचुसेट्समा ९७, मेरिल्याण्डमा ८३ र भर्जिनियामा ८१ नेपालीका अध्यागमन मुद्दाहरु पेन्डिङ रहेका छन् ।
त्यस्तै कोलोराडोेमा ५८, जर्जियामा ५०, न्युजर्सीमा ३८, वासिंटनमा २५, पेन्सिलभेनियामा २०, न्यु मेक्सिकोमा १४, इलिनोयमा १३, ओहायोमा १२, मिनेसोटमा १० र एरिजोनामा १० नेपालीका अध्यागमन मुद्दाहरु अदालतमा पेन्डिङ अवस्थामा रहेका छन् । नेब्रास्कामा ६, केन्टकीमा ५, मिसिगन, नेभाडा, टेनेसी र युटाहमा दुईदुई, मिजौरी, ओरेगन, कनेक्टिकट, फ्लोरिडा र हवाईमा एकएक नेपालीका अध्यागमन मुद्दाहरु पेन्डिङ रहेको एक्जुकेटिभ अफिस फर इमिग्रेशन रिभ्युको तथ्यांकले जनाएको छ ।
