अष्ट्रेलियामा बन्दुकधारीको आक्रमण, ४ को मृत्यु
प्रकाशित मिति : जेष्ठ २१, २०७६ मंगलबार
नर्थ अष्ट्रेलियाको डार्विनमा बन्दुकधारीको आक्रमणमा कम्तीमा ४ जनाको मृत्यु भएको छ । स्थानीय समय अनुशार मंगलबार साँझ पौने ७ बजेको घटनाको झण्डै एक घण्टापछि संदिग्ध आक्रमणकारीलाई नियन्त्रणमा लिइएको छ ।
स्थीति नियन्त्रणमा आइसकेको र सर्वसाधारणलाई कुनै थप खतरा नरहेको प्रहरीले जनाएको छ । के कारणले घटना गराइएको हो भन्नेबारे अनुसन्धान भइरहेको प्रहरीले जनाएको छ ।
आक्रमणकारीले आफ्नो सटगनबाट अन्धाधुन्द गोली चलाएको जनाइएको छ । घटनामा एकजना घाइते भएको जनाइएको छ । अष्ट्रेलियाका प्रधानमन्त्रीले घटनालाई दुखद हिंशात्मक घटना बताएका छन् ।
सन् १९९६ को घटनापछि बन्दुकमा नियन्त्रण गर्ने कडा कानुन ल्याइएपछि अष्ट्रेलियामा गोली प्रहारका घटना निकै दुर्लभ मानिन्छन् । सन् १९९६ मा तास्मानियामा भएको गोलीकाण्डमा ३५ जनाको ज्यान गएको थियो । त्यसपछि तत्कालिन प्रधानमन्त्री जोन हवार्डले तीब्र गतिका राइफल, सटगनमा प्रतिबन्ध लगाउनुका साथै हतियार सम्बन्धि कानुनमा कडाई गरेका थिए । त्यसपछि १० लाखभन्दा धेरै हतियार जम्मा गरेर नष्ट समेत गरिएको थियो ।
गत महिना मेलबर्न नाइट क्लबको बाहिर एकजना सुरक्षा गार्डको हत्या भएको थियो भने ५ जना घाइते भएका थिए ।