न्युयोर्कमा आइतबार मुख्यमन्त्री शेरधन राईसँग अन्तरकृया, कार्यक्रम ज्याक्सनहाइटमा रहेको बेलोजिनो हलमा
प्रकाशित मिति : असार २१, २०७६ शनिबार
अमेरिका भ्रमणमा रहनुभएका प्रदेश नं १ का मुख्यमन्त्री शेरधन राईले आइतबार न्युयोर्क र आसपासका क्षेत्रमा रहेका नेपालीहरुसँग अन्तरकृया गर्नुहुने भएको छ । अमेरिकाको बाल्टिमोरमा नेपाली राष्ट्रिय सम्मेलनमा प्रमुख अतिथिका रुपमा सहभागी मुख्यमन्त्री राई त्यसपछि न्युयोर्क आउने कार्यक्रम छ ।
प्रदेश सरकारको सिफारिस र सङ्घीय सरकारको स्वीकृति बमोजिम मुख्यमन्त्री राई अमेरिका आउनुभएको हो । नेपाली महावाणिज्यदूतावास न्युयोर्कको आयोजनामा हुने आइतबारको कार्यक्रममा सहभागिताका लागि सबैलाई अनुरोध समेत गरिएको छ ।
खासगरी प्रदेश नम्बर १ बाट अमेरिकाको न्युयोर्क र आसपासका क्षेत्रमा आइ बसोबास गर्नेहरुलाई केन्द्रीत गरेर न्युयोर्कमा अन्तरकृया कार्यक्रम गर्न लागिएको प्रवासी नेपाली मञ्च अमेरिकाका महासचिव राधाकृष्ण देउजाले जानकारी दिनुभयो ।
आफ्नो प्रदेशबाट विदेशका बिभिन्न ठाउँमा रहनु भएका नागरिकहरुलाइ के कसरी अपनत्व महशुस गराउन सकिन्छ, के कस्ता अधिकार र अवसरहरु दिन सकिन्छ, प्रवासमा बसेका एक नम्बर प्रदेशका नागरिकहरुबाट प्रदेश नम्बर एकले के कस्ता सहयोग पाउन सक्छ, भन्ने विषयमा छलफल केन्द्रीत हुने जनाइएको छ ।
कार्यक्रम न्युयोर्कको ज्याक्सनहाइटमा रहेको बेलोजिनो हलमा दिउसो २ ३० बजेदेखि ५ बजेसम्म हुने नेपाली महावाणिज्यदूतावास न्युयोर्कले जनाएको छ ।