धार्मिक विद्यालयमा विद्यार्थीलाई चरम यातना
प्रकाशित मिति : आश्विन १३, २०७६ सोमबार
नाइजेरियाको एउटा धार्मिक विद्यालयबाट पाँच सयजनाको उद्धार भएको छ । उत्तरी नाइजेरियाको काडुना राज्यमा सञ्चालित एउटा मुस्लिम विद्यालयबाट उनीहरूको उद्धार गरिएको हो । बन्दीगृहका रूपमा रूपान्तरण गरिएको सो विद्यालयका विद्यार्थीमाथि चरम यातना दिइएको प्रहरीले जनाएको छ ।
मानव दासताको केन्द्र
‘प्रार्थना गरे पनि उनीहरूले पिट्थे । पढ्दा झन् कुट्थे,’ विद्यालयकी छात्रा इसा इब्राहिमले भनिन् । सो स्थान आधुनिक मानव दासताको मुख्य केन्द्र बनेको प्रहरीले जनाएको छ । पीडितमध्ये केहीलाई यौन दुव्र्यवहार गरिएको अधिकारीहरूले जनाएका छन् । सोही केन्द्रमा जस्तै अन्य क्षेत्रमा पनि त्यस्तै घटना भएको हुन सक्ने अधिकारीहरूले अनुमान गरेका छन् । विद्यालयबाट शिक्षकलगायत अन्य केही पक्राउ परेका छन् ।
काडुनाका प्रायः मुसलमानले आफ्ना नानीबाबुलाई विद्यालय पठाउन सक्दैनन् । अधिकांश गरिबले धार्मिक पादरीले खोलेका कुरानसम्बन्धी विद्यालयमा पठाउँछन् । सरकारले अन्य विद्यालयमा पनि अनुसन्धान गर्ने जनाएको छ ।
इसा इब्राहिमको अग्निपरीक्षा
‘छोराको बानी सुधार्न भन्दै’ इब्राहिमका अभिभावकले उनलाई दुई साताअघि सो विद्यालयमा पठाएका थिए । तर, प्रहरीले विद्यालयमा छापा मार्ने अघिल्लो दिन विद्यालयबाट भागेको उनले बताए । विद्यार्थीलाई एउटा पुरानो जेनेरेटरमा बाँध्नेदेखि हात माथि ठड्याएर भित्तामा झुन्डाइने गरेको उनले बताए । ‘यातनाका कारण शरीरका विभिन्न भागमा घाउ भएको छ । शरीरको प्रायः सबै भागमा घाउ लागेको छ,’ उनले भने, ‘निदाइरहेको वेलामा विद्यार्थीलाई लौरीले कुट्थे ।’ आफूलाई धेरै दिनसम्म भोकभोकै राखेर निस्तो भात खान दिइएको उनले बताए । केन्द्रमा राखिएका प्रायः विद्यार्थी कमजोर भएको उनले बताए ।
केन्द्रबाट पाँच वर्षसम्मका बालबालिकाको उद्धार गरिएको छ । सो विद्यालय धेरै वर्षदेखि सञ्चालनमा आएको विश्वास गरिएको छ । विद्यालयबाट उद्धार गरिएका पुरुष तथा किशोरमध्ये प्रायः सबै उत्तरी नाइजेरियाका थिए । तर, दुईजना बुर्किनो फासोको भएको जनाइएको छ ।
यातनागृह
दारु इमाम अहम्द बुन ह्याम्बल फ्यासिलिटी केन्द्र मुस्लिम विद्यालय र सुधार गृह दुवैको भूमिकामा सञ्चालित भएको विश्वास गरिएको छ । जटिल स्वभाव भएका बालबालिका तथा पुरुषलाई विद्यालयमा भर्ना गरिएको थियो । गुलाबी रंगको सो दुईतले भवनलाई बाहिरबाट ठूला पर्खालले घेरिएको छ भने पर्खालमाथि काँडेतार लगाइएको छ । विद्यालय भवनमा एक दर्जनभन्दा बढी कोठा छन् भने हावा प्रवाहका लागि साना झ्याल राखिएका छन् । विद्यालयको बाहिरी गेट भने भव्य र आकर्षक देखिन्छ ।
अधिकांश विद्यार्थीलाई कारका चक्का र जेनेरेटरमा फलामे साङ्लोले बाँधिएको अवस्थामा उद्धार गरिएको थियो । विद्यार्थीको कथित खराब स्वाभावलाई सुधार्न यातना दिइएको बताइएको छ । कतिपय अभिभावकलाई लामो समयदेखि आफ्ना नानीबाबुलाई भेट्न दिइएको थिएन । ‘बच्चाहरूको यस्तो दुर्गति हुन्छ भन्ने थाहा पाएको भए हामीले विद्यार्थीलाई विद्यालय पठाउने नै थिएनौँ,’ इब्राहिम नाम गरेका एक अभिभावकले बताए ।
