राष्ट्रपति ट्रम्प न्युयोर्कमा, भोलि भेट्रान डे परेडलाई सम्बोधन गर्ने
प्रकाशित मिति : कार्तिक २४, २०७६ आईतबार
अमेरिकी राष्ट्रपति डोनाल्ड ट्रम्प सोमबार हुने भेट्रान डे परेडलाई सम्बोधन गर्न न्युयोर्क आइसकेका छन् । अमेरिकी राष्ट्रपतिले भेट्रान डे परेडलाई सम्बोधन गर्न लागेको यो नै पहिलो पटक हो ।
परेडका लागि शनिबार राती राष्ट्रपति ट्रम्प न्युयोर्क आइपुगेका हुन् । सोमबार परेडलाई सम्बोधन गरेपछि उनले मेडिशन स्क्वायर पार्कमा स्मारकमा माल्यार्पण गर्ने कार्यक्रम रहेको छ ।
युनाइटेड वार भेट्रान काउन्सिलले आयोजना गर्ने यो बर्षको परेड १ सयौं परेड हो । हरेक बर्ष परेडमा राष्ट्रपतिलाई निम्ता गरिदै आएपनि त्यस्तो निम्ता स्वीकार्ने ट्रम्प पहिलो अमेरिकी राष्ट्रपति भएका छन् ।
परेडमा पाँचौं एभिन्युहुँदै झण्डै २५ हजारले सहभागिता जनाउने अपेक्षा गरिएको छ । सन् १९९५ मा ट्रम्पले परेडलाई २ लाख डलर डोनेशन गरेका थिए । न्युयोर्कका मेयर बिल ब्लाजिओले परेडलाई राजनीतिकरण गर्न नहुने बताएका छन् ।