बोस्टनमा एयरबीएनबीले हटायो हजारौं ‘होस्ट’
प्रकाशित मिति : मंसिर १७, २०७६ मंगलबार
आवासको अनलाइन मार्केट प्लेस एयरबीएनबीले अमेरिकाको बोस्टनमा आवास प्रदान गर्दै आएका हजारौं होस्टलाई हटाएको छ । एकमहिना अगाडिमात्र बोस्टनमा एयरबीएनबीका ४ हजार लिस्टिङहरु रहेकोमा सबै हटाएर अहिलेसम्म ७३७ मात्र कायम गरिएको छ ।
एयरबीएनबी होटलको साटो घरमै खाली भएको कोठा समेत होटलसरह भाडामा लगाउन सकिने अनलाइन मार्केटप्लेस हो । आफ्ना खाली घर वा अपार्टमेन्ट पनि यो प्लेटफर्ममार्फत एकरातदेखि महिनौंसम्म भाडामा लगाउन सकिन्छ भने ग्राहकले होटल सरह बुक गरेर बस्न सक्छन् ।
बोस्टन सिटीले एयरबीएनबी संचालन गर्न चाहनेहरुले सिटीबाट स्वीकृत लिनुपर्ने नयाँ नियम लागु गरेपछि यसबाट सेवा प्रदायकहरु प्रभावित भएका हुन् । विशेषरुपमा वा मुख्यरुपमा अल्पकालिन आवासका रुपमा प्रयोग गरिने सम्पत्तिहरुमा एयरबीएनबी संचालनमा रोक लगाउनका लागि नयाँ नियम ल्याइएको हो ।
विश्वका अन्य कैयन सिटीहरुले एयरबीएनबी संचालनका लागि स्थानीय सरकारबाट स्वीकृत लिनुपर्ने प्रावधान सुरु गरेलगत्तै बोस्टनमा पनि यो नियम आएको हो । अहिलेसम्म बोस्टनमा १७७८ आवेदनहरु परेको र ७३७ आवेदन स्वीकृत गरिएको बोस्टन सिटीका अधिकारीहरुले जनाएका छन् ।
सुचीमा बोस्टनको लाइसेन्स नम्बर नभएकाहरुलाई सुचीबाट हटाइएको एयरबीएनबीका प्रवक्ताले जनाएका छन् । न्यु ओर्लियान्स र ओरेगनले पनि यस्तै प्रकारको नियम ल्याइसकेका छन् ।
यो नियमले बोस्टन क्षेत्रमा एयरबीएनबी संचालन गर्दै आएका कैयन नेपालीहरु समेत प्रभावित भएका छन् ।