नेपालका रुखले सोंसे एक करोड टन कार्बन, सरकारलाई ५ अर्ब आम्दानी हुने
प्रकाशित मिति : मंसिर १७, २०७६ मंगलबार
नेपालका रुखले एक करोड टन कार्बन डाईअक्साइड सोंसेवापत नेपाल सरकारलाई ५ अर्ब आम्दानी हुने भएको छ । विश्व बैंकको वन कार्बन साझेदारी सहयोगबाट करिब ५ अर्ब रुपैयाँ नेपाललाई प्रदान गरिनेछ ।
वन तथा वातावरण मन्त्रालयका तर्फबाट रेड कार्यान्वयन केन्द्रले १० वर्ष लगाएर कार्बन बिक्री प्रक्रिया अन्तिम चरणमा पुर्याएको हो । विश्व बैंकसँग उत्सर्जन कटौती खरिद सम्झौता भएपछि उक्त रकम नेपाल भित्रिन थाल्नेछ ।
नेपालले विश्व बैंकसमक्ष प्रस्तुत गरेको उत्सर्जन न्यूनीकरण कार्यक्रम दस्तावेज डेढ वर्षअघि नै स्वीकृत भएको थियो । तराईका १३ जिल्लामा रुखले सोंसेको कार्बनवापत प्रतिटन ५ डलरका हिसाबले तिर्न विश्व बैंक सहमत भइसकेको छ ।
हानिकारक मानिने कार्बन डाइअक्साइड जलवायु परिवर्तनको एक कारक हो । कार्बन डाइअक्साइड, मिथेनलगायत हरितगृह ग्यासको बढ्दो उत्सर्जनका कारण तापक्रम बढ्दा विश्वव्यापी रूपमै हावापानी परिवर्तन भइरहेको छ ।