पेन्सिलभेनियामा भयानक दुर्घटना : बस, ट्रक र अन्य गाडीहरु जुध्दा ५ को मृत्यु, ६० घाइते
प्रकाशित मिति : पुस २०, २०७६ आईतबार
अमेरिकाको पेन्सिलभेनियामा आइतबार विहानै भएको एउटा दुर्घटनामा कम्तीमा ५ जनाको मृत्यु भएको छ भने ६० जना घाइते भएका छन् । पर्यटक बस, ट्रकहरु र अन्य गाडीहरु एकआपसमा जुध्दा उक्त दुर्घटना भएको हो ।
डाउनटाउन पिट्सबर्गदेखि ४० माइल दक्षिणपूर्वमा भएको दुघंटनामा घाइते ६० जनालाई उपचारका लागि अस्पतालमा लगिएको छ । उनीहरुको तीनवटा अस्पतालमा उपचार भइरहेको छ ।
दुर्घटनाका कारण बस उल्टिएको छ भने अन्य गाडीहरु एक आपसमा ठोक्किएका छन् । दुर्घटना विहान साढे ३ बजे भएको जनाइएको छ ।
दुर्घटनाका कारण ब्रिजउड र न्यु स्टान्टनको बीचमा राजमार्गका दुईतर्फी बाटो नै बन्द गराउनु परेको थियो । पूर्वतिर यात्रा गरिरहेका गाडीहरुलाई वैकल्पिक बाटो लिन सुझाव दिइएको छ ।
दुर्घटनामा पर्नेमा फेडेक्सको ट्रक पनि रहेको छ । अन्य कतिवटा गाडीहरु ठोक्किएका छन् भन्नेबारे स्पष्ट भइसकेको छैन ।