कोरोना भाइरस संक्रमणको शंका लागेमा युएससीआईएसले अन्तरवार्ता वा बायोमेट्रिक नलिने
प्रकाशित मिति : माघ २२, २०७६ बुधबार
कोरोना भाइरस संक्रमणको शंका लागेमा युएससीआईएसले अन्तरवार्ता वा बायोमेट्रिक नलिने तथा नयाँ मिति दिने भएको छ । युएससीआईएसले आज एक सुचना जारी गर्दै यदि युएससीआईएसको अप्वाइन्टमेन्टका आएको कुनै व्यक्ति वा साथमा आएको व्यक्तिमाथि कोरोना भाइरस संक्रमणको शंका लागेमा युएससीआईएसले उक्त दिनको अप्वाइन्टमेन्ट रद्द गरेर नयाँ अप्वाइन्टमेन्ट दिने जनाएको छ ।
यदि अमेरिकाका कुनै पनि युएससीआईएसका कार्यालयमा अप्वाइन्ट लिएको व्यक्तिले बिरामी महसुस गरेको खण्डमा उक्त अप्वाइन्टमेन्टको मिति परिवर्तन गर्न युएससीआईएसले सुझाव दिइको छ । अप्वाइन्टमेन्टको नयाँ मिति लिंदा कुनै जरिवाना तिर्नु नपर्ने युएससीआईएसले जनाएको छ ।
यदि ज्वारो आउने, खोकी लाग्ने, रुघा लाग्ने, स्वास फेर्न मुस्किल हुने, टाउको दुख्ने, घाँटी दुख्ने भएमा कोरोना भाइरस संक्रमण भएको हुनसक्ने भएकाले यदि त्यस्तो लक्षण देखिएमा अप्वाइन्टमेन्ट सार्न युएससीआईएसले सुझाव दिएको छ ।
यसैबीच युएससीआईएसले चीनको बेइजिंग र गोन्जाओमा रहेका फिल्ड अफिसहरु बन्द गरेको छ । त्यहाँ अप्वाइन्टमेन्ट भएकाहरुलाई नयाँ अप्वाइन्टमेन्टको मिति दिएर सुचित गरिने युएससीआईएसले जनाएको छ ।
कोरोना भाइरसका कारण आएको विशेष अवस्थाका कारण अमेरिकाबाहिर जान नसक्ने अवस्था आएमा आवेदकले आफ्नो भिसाको अवधि थप्नका लागि समेत आवेदन दिनसक्ने जनाइएको छ । विशेष परिस्थीतिबाट प्रभावितहरुलाई सहयोग गर्ने युएससीआईएसले जनाएको छ ।