८ देशबाट हुने आयातमा रोक !
प्रकाशित मिति : फाल्गुन २९, २०७६ बिहीबार
विश्व स्वास्थ संगठन (डब्लुएचओ)ले नेपाल कोरोना भाइरसको उच्च जोखिममा रहेको औंल्याएपछि सरकारले विभिन्न देशबाट हुने आयातमा रोक लगाएको छ । कोरोनाको उच्च संक्रमण भएका ८ वटा देशबाट हुने आयातमा सरकारले रोक लगाएको हो ।
सरकारले चीन, इरान, इटाली, दक्षिण कोरिया, जापान, फ्रान्स, जर्मनी र स्पेनबाट हुने आयातमा रोक लगाएको हो । कोरोना बढी संक्रमित रहेका भनिएका यी मुलुकबाट हुने खाद्यान्न र पशुजन्य वस्तुहरूको आयातमा रोक लगाएको हो । अध्यागमन विभागले कोरोनाको बढी संक्रमित भएका देशहरूबाट हुने आयात रोक लगाउनु भनेपछि सरकारले मंगलबार आयातमा रोक लगाउने निर्णय गरेको हो ।
कार्यवाहक प्रधानमन्त्री ईश्वर पोखरेलको अध्यक्षतमा बसेको बैठकले कोरोनाको बढी संक्रमण भएका देशबाट हुने आयातमा रोक लगाउने निर्णय गर्दै सम्बन्धित मन्त्रालयहरूमा परिपत्र गरेको छ । सोहीअनुसार कृषि तथा पशुपंछि विकास मन्त्रालयले खाद्यान्न र पशुजन्य वस्तुको आयात हुन नदिन मन्त्रालयअन्तर्गतका विभागहरूलाई परिपत्र गरेको छ ।
मन्त्रालयले पशु सेवा विभाग, कृषि विभाग र खाद्य प्रविधि तथा गुण नियन्त्रण विभागलाई परिपत्र गर्दै खाद्यान्न र पशुजन्य वस्तुको आयातमा रोक लगाउन परिपत्र गरेको हो । ‘अर्को सूचना नभएसम्मका लागि आयात स्थगित गर्न सबै निकायले आ–आफ्नो ठाउँबाट कार्यान्वयन गराउनु’ कार्यवाहक प्रधानमन्त्री पोखरेलको अध्यक्षतामा बसेको बैठकले सम्बन्धित मन्त्रालयलहरूलाई पठाइएको परिपत्रमा उल्लेख गरिएको छ ।