अमेरिकामा ट्याक्स फाइलका लागि ३ महिना थप, नयाँ डेडलाइन जुलाई १५
प्रकाशित मिति : चैत्र ७, २०७६ शुक्रबार
अमेरिकामा व्यक्तिगत ट्याक्स फाइलका लागि ३ महिना थप गरिएको छ । कोरोना संक्रमणका कारण उत्पन्न समस्यासँग जुध्न यस्तो सुविधा दिइएको हो ।
अमेरिकामा व्यक्तिगत ट्याक्स फाइलको अन्तिम मिति अप्रिल १५ हो । तर अब त्यसमा ९० दिन थपेर जुलाई १५ बनाइएको छ । अर्थात् जुलाई १५ सम्म पनि व्यक्तिगत ट्याक्स फाइल गर्न सकिने भएको छ ।
At @realDonaldTrump’s direction, we are moving Tax Day from April 15 to July 15. All taxpayers and businesses will have this additional time to file and make payments without interest or penalties.
— Steven Mnuchin (@stevenmnuchin1) March 20, 2020
अर्थमन्त्री स्टेफन मन्चिनले शुक्रबार ट्याक्स फाइलको डेडलाइन थपिएको बताएका हुन् । अमेरिकी राष्ट्रपति डोनाल्ड ट्रम्पको निर्देशनमा आफूहरुले समय बढाएको उनको भनाई छ ।
व्यक्तिगतमात्र नभएर विजनेश ट्याक्स फाइलका लागि पनि समय बढाइएको मन्चिनले बताएका छन् । थपिएको सयमभित्र कुनै जरिवाना र ब्याज विना ट्याक्स फाइल गर्न र ट्याक्सको रकम तिर्न सकिने भएको छ ।
I encourage all taxpayers who may have tax refunds to file now to get your money.
— Steven Mnuchin (@stevenmnuchin1) March 20, 2020
तर ट्याक्स रिफण्ड पाउने करदातालाई भने अहिले नै ट्याक्स फाइल गर्न आव्हान गरिएको छ । किनभने संकटको बेलामा उक्त रिफण्ड रकम काम आउनसक्ने भएकाले यस्तो अनुरोध गरिएको हो । यद्यपी उनीहरुले पनि जुलाई १५ भित्र फाइल गर्न पाउनेछन् ।
