दुई युवाबाट जर्सी सिटीमा बिरामी नेपालीका घरमा औषधी र ग्रोसरी पुराउने अभियान सुरुवात
प्रकाशित मिति : चैत्र १२, २०७६ बुधबार
दुई नेपाली युवाले न्युजर्सीको जर्सी सिटीमा कोरोना संक्रमणको लक्षण देखिएका र कोरोना भाइरस संक्रमित नेपालीका घरमा औषधी र ग्रोसरी पुराउने अभियान सुरुवात गरेका छन् । दिपक परियार र बिक्की पुलामीले यस्तो अभियानको सुरुवात गरेका हुन् ।
दिपक परियार खसोखासका सम्पादक समेत हुन् भने बिक्की पुलामी कलाकार हुन् । कोही नेपाली संक्रमित भएको खण्डमा वा लक्षण देखिएको खण्डमा घरभित्रै बस्न आव्हान गर्दै आफूहरुले अत्यावश्यक ग्रोसरी र औषधी ढोकामै लगेर छाड्ने व्यवस्था गर्ने दिपक परियारले बताए ।
‘यो अभियानमा यहाँका अरु नेपालीहरु पनि जोडिनुभएको छ । यो बेला एकले अर्कालाई सघाउने बेला हो । त्यसैले यो अभियानमा साथ दिन अरु नेपालीहरुलाई पनि अनुरोध गर्दछौं ।’ – दिपक परियारले भने ।
त्यस्तै जर्सी सिटी र आसपासका क्षेत्रमा बसोबास गर्ने नेपाली समुदायको कुनै सदस्यलाई कोरोनाको संक्रमण छ वा लक्षण देखिएको छ भने आफूहरु यो अवस्थामा ग्रोसरी, पेपर टावेल, औषधी लगायतका सामान ढोकामा पुराउन तयार रहेको बिक्की पुलामीले जानकारी दिए ।
उनीहरुले फेसबुकमा जर्सी सिटी अर्जेन्ट नेपाली एड नेटवर्क फर कोभिड १९ समुहको समेत स्थापना गरेका छन् । दीपक परियारलाई ९१७ २४६ २५१० र बिक्की पुलामीलाई ३४७ ७०६ ५४६१ मा सम्पर्क गर्न सकिन्छ ।