हट्टाकट्टा देखिने गुरुङको बेलायतमा कोरोना संक्रमणबाट आज निधन
प्रकाशित मिति : बैशाख १, २०७७ सोमबार
कोरोना भाइरसको संक्रमणले बेलायतमा थप एक जना नेपालीको मृत्यु भएको छ । यो समाचार त्यहाँबाट प्रकाशित हुने नेपाली लिंकले प्रकाशित गरेको छ ।
६५ वर्ष उमेरका ‘हट्टाकट्टा’ देखिने भूपू गोर्खा लक्षिणबहादुर गुरुङको सोमबार बिहान ७ बजे निधन भएको हो ।
बेलायतको रेडिङमा बस्दै आएका गुरुङको स्थानीय रेडिङ बर्कशायर अस्पतालमा उपचारका क्रममा निधन भएको हो ।
पछिल्लो १०/१२ दिनअघि अस्पताल भर्ना भएका गुरुङ १ सातादेखि ‘भेन्टिलेटर’मा थिए । उनमा कोरोनाको संक्रमण पुष्टी भएको थियो ।
मृतक गुरुङका श्रीमती र दुई छोरी बेलायतमै छन् भने अर्की एक छोरी नेपालमा छन्। पुख्र्यौली घर कास्कीको घान्द्रुक भएका उनको पछिल्लो समय पोखराको दीपमा पनि घर थियो । घान्द्रुक समाज रेडिङमा समेत उनी केहि वर्ष पहिला अध्यक्ष थिए ।
‘६ जिआर डब्लुओ २’ का रिटायर्ड गोर्खा गुरुङ निकै हट्टाकट्टा र तन्दुरुस्त देखिन्थे । धुमपान, मद्यपान केहि गर्दैनथे ।
अहिलेसम्म सार्वजनिक भएअनुसार कोरोनाकै कारण बेलायतमा निधन हुने नेपाली ८ पुगेका छन् । जसमध्ये ६ जना पूर्व गोर्खा सैनिक छन् ।
यसअगाडि लन्डनमा शनिबार लण्डनमा निधन भएको ३८ वर्षीया पुष्पा घलेको निधनको कारण ह्दयघात बताइएको थियो । असजिलो महशुस गरेपछि वेष्ट मिडलसेक्स अस्पताल लाने बित्तिकै उनको मृत्यु भएको जनाइएको छ । पारिवारिक श्रोतले उनको मृत्यु ‘कोभिड १९’ बाट नभएको जनाएको छ ।
पोखरा घर भई हाल सडवरी टाउन बस्ने घले केयर होममा कार्यरत थिइन् ।स्वर्गीय घले श्रीमान डिल्लीमान गुरुङ र ८ महिनाको छोरासंग बस्दै आएकी थिइन् ।
उनको गत वर्ष सडवरी चर्चबाटै बिहे भएको थियो । करिब एक दशक अघि बेलायत आएकी पुष्पाले हालैमात्र ब्रिटिश नागरिकताका लागि आवेदन दिएकी बताइएको छ ।