अमेरिकाको सर्वोच्च अदालतकी लिबरल न्यायाधिस रुथ बेडर गेन्सबर्गको निधन
प्रकाशित मिति : आश्विन २, २०७७ शुक्रबार
अमेरिकाका सर्वोच्च अदालतका न्यायाधिस रुथ बेडर गेन्सबर्गको ८७ बर्षको उमेरमा निधन भएको छ । उनी सन् १९९३ मा अमेरिकाको सर्वोच्च अदालतमा न्यायाधिस नियुक्त भएकी थिइन् ।
उनी सर्वोच्चमा लिबरल न्यायाधिसका रुपमा परिचित थिइन् । अमेरिकाको सर्वोच्च अदालतका ९ न्यायाधिसहरुमध्ये ५ जना कन्जरभेटिभ र ४ जना लिबरल रहेकोमा लिबरल न्यायाधिस गेन्सबर्गको निधन भएको हो । सर्वोच्च अदालतका प्रधानन्यायाधिस जोन रोबर्टस कन्जरभेटिभ मानिन्छन् ।
रुथ बेडर सन् १९९३ मा राष्ट्रपति बिल क्लिन्टनबाट सर्वोच्चको न्यायाधिसमा नियुक्त भएकी थिइन् । विगत केही बर्षदेखि उनले अमेरिकामा अध्यागमन, समलिंगी विवाह, मतदान अधिकार लगायतका कैयन सामाजिक र राजनीतिक विषयहरुमा प्रगतिशिलताको पक्ष्रामा मतदान गर्दै आएकी थिइन् ।
उनी क्यान्सरबाट पीडित थिइन् । किमोथेरोपी दिइएपनि उनी दैनिक कामकाज गर्न सफल रहदै आएकी थिइन् । सन् १९८० देखि सन् १९८३ सम्म भने उनी अमेरिकाको पुनरावेदन अदालतमा न्यायाधिस रहेकी थिइन् ।