अध्यागमन अदालतमा सुनुवाई अप्रिल १६ सम्म स्थगित, न्युयोर्कमा मात्र २०९९ नेपालीका केस पेन्डिङ
प्रकाशित मिति : फाल्गुन २१, २०७७ शुक्रबार
न्युयोर्कको अध्यागमन अदालत लगायत अमेरिकाका अन्य कैयन अध्यागमन अदालतमा हिराशतमा नरहेकाहरुको सुनुवाई अप्रिल १६ सम्म स्थगित भएको छ । एक्जुकेटिभ अफिस फर इमिग्रेशन रिभ्युले एक सुचना जारी गरेर अप्रिल १६ सम्मका लागि सुनुवाई स्थगन गरिएको हो ।
अप्रिल १६ सम्म नियमित सुनुवाई स्थगित गरेकोमा त्यसपछिको सप्ताहन्तका कारण कम्तीमा अप्रिल १९ सम्म स्थगित भएको छ । न्युयोर्कको भेरिक स्ट्रीट र फेडरल प्लाजामा रहेका अध्यामगन अदालतहरु हिराशतमा नरहेकाहरुको सुनुवाईका लागि कम्तीमा अप्रिल १९ सम्म बन्द रहनेछन् ।
यी अदालतहरुमा फाइलिङ र हिराशतमा रहेकाहरुको सुनुवाई भने जारी नै रहेको छ । त्यस्तै न्युयोर्कको ब्रोडवेमा रहेको अध्यागमन अदालत पनि फाइलिङका लागिमात्र खुल्ला रहेको छ ।
फेडरल प्लाजामामा मात्र नेपालीहरुका १७ सय ४४ केस पेन्डिङ रहेका छन् भने ब्रोडवेमा २२५ नेपालीका केसहरु पेन्डिङ रहेका छन् । त्यस्तै भेरिक स्ट्रीटमा १२२ जना नेपालीहरुका केसहरु पेन्डिङ रहेका छन् ।
अध्यागमन अदालतमा सुनुवाईहरु स्थगित हुँदा सयौं नेपालीहरु प्रभावित भएका छन् । बर्षौदेखि एसाइलमका मुद्दाको सुनुवाई कुरेर बसेका र परिवारसँग पुनर्मिलनको प्रतिक्षामा बसेका नेपालीहरु अदालत बन्द भएका कारण सुनुवाई पछाडि सर्दा मारमा परेका हुन् । कोरोनाको महामारी सुरु भएदेखि नै मार्चदेखि अध्यागमन अदालतहरु प्रभावित हुँदै आएका छन् ।
अध्यागमन अदालतमा हिराशतमा रहेकाहरुबाहेक अन्यको सुनुवाई हुन नसक्दा कैयन नेपालीहरु मारमा परेका छन् । एक्जुकेटिभ अफिस फर इमिग्रेशन रिभ्युका अनुशार अमेरिकाका अध्यागमन अदालतहरुमा नेपालीहरुका पेन्डिङ केसहरु अझ बढेका छन् ।
अमेरिकाका अध्यागमन अदालतहरुमा नेपालीहरुका ३ हजार ९ सय ७७ केसहरु पेन्डिङ रहेका छन् । नेपालीका अधिकांश अध्यागमन केसहरु एसाइलमसँग सम्बन्धित रहेका छन् । पेन्डिङ केसहरुमध्ये ५० प्रतिशतभन्दा धेरै २ हजार ९९ नेपालीका केसहरु न्युयोर्कका अदालतमा छन् ।
