अस्थायी कामदार भिसा, ग्रिनकार्ड, भिसा थप र परिवर्तन लगायतका १३ वटा आवेदन फर्ममा परिवर्तन
प्रकाशित मिति : चैत्र ६, २०७७ शुक्रबार
अमेरिकी सरकारको अध्यागमन एजेन्सी युएससीआईएसले ग्रिनकार्ड, भिसा थप र परिवर्तन लगायतका १३ वटा आवेदन फर्ममा परिवर्तन गरेको छ । यो परिवर्तन अप्रिल १९ बाट लागु हुने युएससीआईएसले जनाएको छ ।
गत मार्च ९ मा ट्रम्पकालिन पब्लिक चार्जको नियम लागु गर्न रोकेपछि युएससीआईएसले नयाँ आवेदन फर्महरु लागु गरेको हो । आगामी दिनमा अध्यागमन आवेदनहरुका लागि फर्मको मार्च १० को भर्सन प्रयोग गर्न युएससीआईएसले सुझाव दिएको छ ।
अप्रिल १९ सम्म पूराना फर्महरु पनि प्रयोग गर्न सकिने भएतापनि त्यसपछि भने पूराना फर्महरु पूर्णरुपमा अस्वीकार गर्ने युएससीआईएसले जनाएको छ । नयाँ फर्ममध्ये भिसा थप र भिसा परिवर्तनको आवेदन अनलाइनमार्फत दिन सकिने भएतापनि अन्य सबै फर्महरुभने कागजीरुपमा नै भरेर हुलाकबाट पठाउनुपर्नेछ ।
आप्रवासी भिसा स्पोन्सरका लागि भरिने फर्म आई ८६४, स्पोन्सर र परिवारका सदस्यबीचको सम्झौता आई ८६४ ए, स्पोन्सर फर्म आई ८६४ ईजी, स्पोन्सरका लागि छुटको आई ८६४ डब्लु फर्म परिवर्तन गरिएको छ । त्यस्तै भिसा थप र परिवर्तनको आई ५३९ तथा आई ५३९ एमा पनि परिवर्तन गरिएको छ ।
अस्थायी कामदार भिसाका आई १२९, आई १२९ सी डब्ल्यु र आई १२९ सी डब्ल्यु आरमा पनि परिवर्तन गरिएको छ । त्यस्तै ग्रिनकार्ड आवेदन आई ४८५, ग्रिनकार्डको पुरक आवेदन आई ४८५ ए र जागिरको अफरको आई ४८५ जे फर्ममा पनि परिवर्तन गरिएको छ ।
शुल्क मिनाहाका लागि भरिने आई ९१२ फर्ममा पनि परिवर्तन गरिएको युएससीआईएसले जनाएको छ ।
युएससीआईएसका सबै फर्महरु हेर्न यहाँ क्वीक गर्नुहोला ।
