अमेरिकी सिमाबाट छिर्न खोज्ने कागजपत्रविहिन मार्चमा १५ वर्षमै धेरै
प्रकाशित मिति : चैत्र २०, २०७७ शुक्रबार
अमेरिकी सिमाबाट छिर्न खोज्ने कागजपत्रविहिन मार्चमा १५ वर्षमै धेरै पुगेका छन् । मार्च महिनामा अमेरिका छिर्न खोज्ने १ लाख ७१ हजार भन्दा बढी कागजपत्रविहिनलाई नियन्त्रणमा लिएको सीबीपीको तथ्यांकले देखाएको छ । मासिक तथ्यांक हेर्दा यो सन् २००६ यताकै सबै भन्दा उच्च हो ।
जनवरीमा ७८ हजार कागजपत्रविहिनहरु सिमाक्षेत्रमा पक्राउ परेकोमा त्यसमा अहिले नाटकीय बढोत्तरी भएको हो । सिमाक्षेत्रबाट छिर्न खोज्ने कागजपत्रविहिनमा टीएनएजरहरु र बालबालिकाहरु अभिभावक विना नै अभूतपूर्व तरिकाले बढेपछि बाइडेन प्रशासनका सामु चुनौति खडा भएको छ । बाइडेन प्रशासनले सिमाक्षेत्रबाट प्रवेश गर्ने कागजपत्रविहिनलाई प्रारम्भिक प्रकृयासम्मका लागि आपतकालिन आवासका लागि काम गरिरहेको बेलामा सिमाक्षेत्रमा पक्राउ पर्नेहरु बढेका हुन् ।
गत महिना सीबीपीले १८ हजार ८ सय अभिभावकविनाका बालबालिकाहरुलाई नियन्त्रणमा लिएको थियो । यो संख्या फरबरीको तुलनामा ९९ प्रतिशतले बढेको हो । त्यस्तै गतबर्षको मार्चको तुलनामा पनि यो संख्या अत्याधिक हो । गतबर्षको मार्चमा ११ हजार ८ सय ६१ जना अभिभावकविनाका बालबालिकाहरुलाई सीबीपीले नियन्त्रणमा लिएको थियो ।
परिवारका सदस्यको समुहका रुपमा सिमाक्षेत्रमा आइपुग्नेहरुको संख्या पनि मार्चमा ५३ हजार भन्दा बढी नाघेको भएको छ । फेबु्रअरीमा यो संख्या १९ हजार २ सय ४६ र जनवरीमा ७ हजार २ सय ९४ रहेको थियो । राष्ट्रपति बाइडेनले सिमाक्षेत्रमा कागजपत्रविहिनको बढोत्तरीलाई मौषमी ऐतिहासिक संरचनाका रुपमा व्याख्या गरेका छन् । यस्तो ट्रेण्ड ट्रम्प प्रशासनको बेलामा पनि रहेको बाइडेनको भनाई छ ।
पछिल्ला केही दिनमा सिमाक्षेत्रका अधिकारीहरुलाई अभिभावक विना नै अमेरिका प्रवेश गर्ने कागजपत्रविहिन टीनएजर र बालबालिकाको व्यवस्थापनमा हम्मे हम्मे परिरहेको छ । कैयनलाई कानूनी सिमाभन्दा पनि बढी समय हिराशतको अवस्थामा राखिएको छ । उनीहरुले उपलब्ध बेडहरुको प्रतिक्षा गर्दा अस्थायी हिराशतको अवस्थामा राख्नुपरेको हो ।
बाइडेन प्रशासनले जनस्वास्थ्य सम्बन्धि आदेश टाइटल ४२ लगाएर कोरोनाको महामारीका कारण अधिकांश बयस्कहरुलाई मेक्सिको नै फिर्ता गरिदिएको छ । तर यो निष्काशन नीतिका कारण एउटै आप्रवासी पटकपटक सिमाक्षेत्रबाट छिर्न खोज्दा पक्राउ परेका छन् । यो श्रेणीमा कतिजना पर्छन् भन्नेबारे सीबीपीले स्पष्ट पारेको छैन । तर ३० देखि ४० प्रतिशत बयस्कहरु एकपटक फर्काएपछि पनि पुन अमेरिका प्रवेश गर्न खोज्ने पटकेहरु रहेको सीबीपीले जनाएको छ ।
