लङ आइल्याण्डको ‘ओयस्टर बे’को दक्षिण एशियाली सल्लाहकार समितिमा वास्तोला
प्रकाशित मिति : बैशाख ८, २०७८ बुधबार
न्युयोर्कको लङ आइल्याण्डमा रहेको ओयस्टर बेको दक्षिण एशियाली सल्लाहकार समितिको सदस्यमा लङ आइल्याण्डमा निवासी सामाजिक व्यक्तित्व विश्वराज वास्तोलालाई दक्षिण एशियाली सल्लाहकार समितिको सदस्य पदमा मनोनयन गरिएको छ । टाउन अफ ओयस्टर बेको स्थानीय निकायमा रहेको दक्षिण एशियाली सल्लाहकार समितिमा बास्तोलाई मनोनयन गरिएको हो ।
दक्षिण एशियाली सल्लाहकार समितिले समुदायलाई एकै साथ ल्याउन, दक्षिण एशियाली क्षेत्रका विविध कार्यक्रमहरू आयोजना गर्न, र सबै दक्षिण एशियाली सम्बन्धी सामुहिक मुद्दा एवं सरोकारहरू छलफल गरी सम्वन्धित निकायमा कार्यान्वयनको लागि सल्लाह दिने गर्दछ ।
मुस्लीम समुदायको पर्व रमादानको सन्दर्भमा वेस्टरवे टाउन हलमा आयेजित कार्यक्रममा वास्तोलालाई ओयस्टर बे टाउनका क्लर्क रेचर्ड लामार्काले मनोनयन पत्र प्रदान गरेका थिए । कार्यक्रममा वेस्टरवे टाउनका सुपरभाईजर जोसेफ सालाडिनो, अमेरिकाको लागि पाकिस्तानी काउन्सिल जनरल आयस्था अली, एसियन एडभाईजरी वोर्डका प्रिसिडेन्ट ह्यारी मलहोत्रा लगायतले मन्तव्य र शुभकामना दिए ।
विभिन्न राज्यका स्थानीय निकायका विभिन्न पदहरुमा नेपाली अमेरिकनको नियुक्ती र सहभागिता बढिरहँदा बास्तोलाको मनोनयन आएको हो । नेपाली अमेरिकनहरु विस्तारै अमेरिकन मुलधारमा अगाढि बढिरहँदा सामुदायिक बोर्डहरुमा सहभागी हुनेदेखि विभिन्न स्थानीय निर्वाचनहरुमा पनि उम्मेदबारी दिने क्रम बढेको छ ।