न्युयोर्कमा डाक्टर विनोद शाह र स्वास्थ्यकर्मी अमित शाहको पहलमा निशुल्क कोभिड टेस्ट र भ्याक्सिन सपोर्ट
प्रकाशित मिति : बैशाख १६, २०७८ बिहीबार
न्युयोर्कका चर्चित नेपाली डाक्टर विनोद शाह र एवान हेल्थ केयरका सीईओ अमित शाहको पहलमा आजदेखि ज्याक्सनहाइटको डाइभर्सिटी प्लाजामा निशुल्क कोभिड टेस्ट र भ्याक्सिन सपोर्ट सेवा सुरु गरिएको छ । नेपाली समुदायलाई लक्ष्यीत गरेर नेपाली समुदायको सहजताका लागि निशुल्क सेवा सुरुवात गरिएको अमित शाहले जानकारी दिए ।
सुखी न्युयोर्कसँगको सहकार्यमा सुरु गरिएको यो सेवा सातैदिन संचालन हुनेछ । विहान साढे ११ बजेदेखि बेलुका साढे ७ बजेसम्म कोभिड टेस्टका लागि स्वाब संकलन गरिने र यथाशक्य छिटो रिजल्ट प्रदान गरिने शाहले जानकारी दिए । डाक्टर विनोद शाह र अमित शाहको पहलमा ४ जना कर्मचारी राखेर निशुल्क सेवा सुरु गरिएको हो ।
कोरोनाबिरुद्धको भ्याक्सिनको लागि पहल गरिरहेको र छिट्टै भ्याक्सिन लगाउन समेत सुरु गर्ने डाक्टर विनोद शाहले जानकारी दिए । अहिलेका लागि भने कोरोनाबिरुद्धको भ्याक्सिनबारे नेपाली भाषामा उचित परामर्श दिन सुरु गरिएको छ । आवश्यकता अनुशार यो सेवा बर्षभरी नै संचालन गर्ने लक्ष्य रहेको शाहले जानकारी दिए ।
न्युयोर्क सिटीको माताहतमा रहेका प्राइभेट ल्याबहरुसँगको सहकार्यमा पीसीआर टेस्ट सुरु गरिएको छ । अप्वाइन्टमेन्ट आवश्यक नभएकाले र छिटै नतिजा दिइने भएकाले यात्रा गर्न चाहनेहरुले पनि सहज रुपमा पीसीआर टेस्ट गराएर नतिजा लिन सक्नेछन् ।