प्रवासमा फैलिदै विप्लव निकट मोर्चा, अमेरिकामा विश्व शाहको संयोजकत्वमा अधिवेशन आयोजक समिति
प्रकाशित मिति : बैशाख १६, २०७८ बिहीबार
विप्लव नेतृत्वको नेकपा निकट नेपाली जनप्रगतिशील मोर्चा विदेशमा विस्तारित हुँदैछ । यसै क्रममा नेपाली जनप्रगतिशील मोर्चा अमेरिकाले प्रथम अधिवेशन आयोजक समिती गठन गरेको छ ।
बुधवार सम्पन्न मोर्चाको बिस्तारित बैठकले दश सदस्यीय प्रथम अधिवेशन आयोजक समिती गठन गरेको हो । मोर्चाका अध्यक्ष विश्व बहादुर शाहको अध्यक्षतामा सम्पन्न भएको बैठकमा नेपाली जनप्रगतिशील मोर्चा पोर्तुगलका महासचिव तथा यूरोप मोर्चाका सदस्य प्रदीप अधिकारी अतिथी रहेका थिए ।
शहिदहरु प्रति सम्मान ब्यक्त गर्दै एक मिनेट मौनधारण गरि बैठकको प्रारम्भ गरिएको थियो । मोर्चाको बैठकले नेपालमा संसदीय व्यवस्था पूर्णरुपमा असफल भएकोले नेपाली जनताको स्वतन्त्रता र संवृद्धिको लागि वैज्ञानिक समाजवादी व्यवस्था अपरिहार्य भएको ठहर गरेको छ ।
यो व्यवस्थाको असफलताको कारणले नै लाखौं नेपाली दाजुभाइ तथा दिदीवहिनीहरु प्रवासिन बाध्य भएको बैठकले निष्कर्ष निकालेको छ । यहि क्रममा अमेरिका आइपुगेका नेपालीहरुमाथि निरन्तर भौतिक हमलाहरु भइरहेको तथा यसरी नष्लवाद वा अन्य कुनै कारणवाट प्रभावित भएर नेपालीहरुमाथि भएको भौतिक हमलाको बैठकले भत्र्सना समेत गरेको छ ।
बैठकका अतिथी प्रदिप अधिकारीले नेपालको राजनीतिक अवस्था, प्रवासमा हामीले खेल्नु पर्ने भूमिका तथा आजको सामाजिक संरचनामा विकास गर्नु पर्ने राजनीतिक, सामाजिक तथा सांस्कृतिक चेतनाको विकास, अमेरिकामा मोर्चाको आवश्यकता र त्यसले खेल्नु पर्ने भूमिकाको बारेमा आफ्नो धारणा प्रस्तुत गरेका थिए ।
विश्व बहादुर शाहको संयोजकत्वमा गठित समितिमा सचिव दिपक लामिछाने सदस्यहरु दर्शना नेपाली, पंकज कट्टेल, कृष्णध्वज थापा, अर्जुन नेपाल, नविन चौलागाईं, रामचन्द्र पहारी, खगेश्वर काप्री र अशिम घिमिरे रहेका छन ।
दिपक लामिछानेले संचालन गरेको बैठ्कले कार्यसमितिको तत्काल बैठक बसी अधिवेशनको मिती तय गर्ने निर्णय गरेको छ ।
