कोरोना संक्रमणपछि सिकिस्त भएर बाँचेका न्युयोर्कका डा. शाहको नेपाललाई स्वास फेर्न सहयोग अभियान
प्रकाशित मिति : बैशाख २६, २०७८ आईतबार
कोरोना संक्रमणबाट सिकिस्त भएर बाँचेका न्युयोर्कका नेपाली चिकित्सक डाक्टर विनोद शाहले नेपालमा अक्सिजन कन्सन्ट्रेटर र स्वास्थ्य सामाग्रीहरु सहयोगका लागि अभियान संचालन गरेका छन् । डाक्टर शाहले ५० हजार डलरको लक्ष्यसहित गोफण्डमीमा अभियानको सुरुवात गरेका छन् भने केही थान अक्सिजन कन्सन्ट्रेटर किनिसकेको समेत जानकारी दिएका छन् ।
कोरोना महामारी डरलाग्दो भइरहँदा नेपालमा स्वास्थ्य सामाग्रीको अभाव बढ्दो रहेको छ । अक्सिजनको अभाव देखिएको छ भने अस्पतालहरु भरिएका छन् । प्रधानमन्त्री केपी शर्मा ओलीले विदेशी राष्ट्रहरुसँगको सहयोगको आव्हान गरेका छन् । यो अवस्थामा डाक्टर शाह र पत्नी डाक्टर सुजाता शाहले नेपाललाई स्वासफेर्न सहयोग गरौं भन्ने अभियान सुरु गरेका हुन् ।
तपाई पनि डाक्टर शाहको अभियानमा सहयोग गर्न चाहनुहुन्छ भने यहाँ क्लीक गर्नुहोला ।
डाक्टर विनोद शाह गतबर्षको अप्रिलमा कोरोना संक्रमणबाट सिकिस्त भएर अस्पतालमा भर्ना भएका थिए । उनले कैयन दिन अस्पतालमा अक्सिजनको सहायतामा उपचार गराएका थिए । अस्पतालबाट फर्केपछि उनले कोरोना संक्रमित अन्य व्यक्तिलाई आफ्नो अनुभवका आधारमा विभिन्न सल्लाह दिने र सहयोग उपलब्ध गराउने गर्दै आएका छन् ।
झण्डै २० बर्षदेखि अमेरिकाको न्युयोर्कमा मेडिकल फिल्डमा खटिरहेका डाक्टर विनोद शाह लामो समयदेखि सामाजिक कार्यमा सकृय रहदै आएका न्युयोर्कबासी नेपाली हुन् । २०१९ सालमा धनुषाको भुतही पटेर्वा गाविसमा बुबा असर्फी शाह र आमा रामसती देवी शाहका पाचौं छोराको रुपमा मध्यमवर्गीय परिवारमा जन्मिएका डाक्टर शाहका ५ दाजुभाई र २ जना दिदीबहिनीहरु रहेका छन् ।
बंगालादेशको ढाकामा एमबीबीएस अध्ययन पूरा गरिसकेपछि उनले २ वर्ष पोष्ट ग्रयाजुयट तालिम र अर्थोपेडिकमा तीनवर्षे डिप्लोमा समेत गरे । बंगालादेशको पढाइ सकेर शाहले जनकपुरमा फर्केर आफ्नै क्लिनिक खोले भने अञ्चल अस्पतालमा जागिर समेत खाए ।
जनकपुरमा काम गर्दैगर्दा उनी एउटा निजी तालिमका क्रममा अमेरिकाको बोस्टनमा आए । त्यसपछिका चारवर्ष उनले बोस्टनमा रिसर्चकै क्रममा बिताए । सन् १९९९ मा न्युयोर्क आएका डाक्टर शाहले रेसिडेन्सी तालिमको कोर्स पुरा गरे । जुन तालिमपछि उनले अमेरिकाको डाक्टरको मान्यता पाए । त्यसपछि उनले पेन म्यानेजमेन्टमा फेलोसीप गरे ।
त्यसपछि सन् २००४ मा उनले न्युयोर्ककै अल्बर्ट आइन्स्टाइन युनिभर्सिर्टीमा एसिस्टेन्ट प्रोफेसरको जागिर पाए । युनिभर्सिटीको एउटा विभागमा निर्देशकको जिम्मा समेत पाए उनले । युनिभर्सिर्टीमा काम गर्दा गर्दै उनले सन् २००८ मा न्युयोर्कको योंकर्समा आफ्नै मेडिकल स्थापना गरेका थिए ।
