अब फोनमार्फत युएससीआईएसको बायोमेट्रिक अप्वाइन्टमेन्ट सार्न सकिने
प्रकाशित मिति : बैशाख २८, २०७८ मंगलबार
अब फोनमार्फत युएससीआईएसको बायोमेट्रिक अप्वाइन्टमेन्ट पुनर्तय गर्न सकिने भएको छ । आवेदक, याचिकाकर्ताहरु, अनुरोधकर्ताहरु र लाभग्राहीले युएससीआईएसका आवेदन सहायता केन्द्रहरुमा फोनमार्फत बायोमेट्रिक अप्वाइन्टमेन्ट पुनतर्य गर्न सक्ने युएससीआईएसले स्पष्ट पारेको छ ।
यस अगाडि आवेदकले बायामेट्रिक अप्वाइन्टमेन्टहरु पुनर्तय गर्नका लागि लिखितरुपमा अनुरोध गर्नुपर्ने व्यवस्था रहेको थियो । नयाँ परिवर्तनले अब अनावश्यक कागजीप्रकृयाको झण्झट हटाउने र युएससीआईएसलाई आवेदकका अनुरोधहरु अझ प्रभावकारी तरिकाले ट्रयाक गर्न मद्दत गर्ने अपेक्षा गरिएको छ ।
आवेदकले आफ्नो बायामेट्रिक अप्वाइन्टमेन्ट पुनर्तय गर्नका लागि उचित कारण दिन सक्नुपर्नेछ । साथै सुरुको बायोमेट्रिक अप्वाइन्टमेन्टको मिति र समयभन्दा अगाडि नै पुनर्तयका लागि फोन सम्पर्क गर्नुपर्नेछ ।
यदि आवेदकले बायोमेट्रिक अप्वाइन्टमेन्ट सार्नका लागि राम्रो कारण दिन नसकेको खण्डमा वा सुरुको बायोमेट्रिक अप्वाइन्टमेन्टको मिति र समय अगाडि नै फोन सम्पर्क नगरेको खण्डमा युएससीआईएसले आवेदन परित्याग गरेको निष्कर्ष निकाल्न सक्नेछ । परिणामस्वरुप आवेदन अस्वीकृत हुनसक्नेछ ।
युएससीआईएसको बायोमेट्रिक अप्वाइन्टमेन्ट सार्न युएएससीआईएसको सम्पर्क केन्द्रमा ८०० ३७५ ५२८३ मा फोन गर्नुपर्नेछ ।
