अब ग्रिनकार्डवाहक पूजारी अमेरिकाबाहिर एकैपटकमा १ बर्षबढी बसेपनि नागरिकता आवेदन दिन पाउने
प्रकाशित मिति : जेष्ठ ११, २०७८ मंगलबार
योग्य धार्मिक कार्यमा संलग्न ग्रिनकार्डवाहकहरुलाई अब अमेरिकामा नागरिकता आवेदनको प्रयोजनामा आवासीय निरन्तरताका सन्दर्भमा छुट दिइने भएको छ । सामान्यतया अमेरिकामा नागरिकता आवेदन दिने ग्रिनकार्डवाहक अमेरिका छाडेको ६ महिनाभित्र अमेरिका फर्कर्नुपर्ने नियम रहेपनि धार्मिक काममा संलग्नहरुलाई भने यसको छुट दिइने नीति निर्देशिका युएससीआईएसले प्रकाशित गरेको छ ।
अर्थात् उनीहरु अमेरिकाबाहिर एकपटकमा १ बर्षभन्दा धेरै समय बसेतापनि नागरिकताको लागि आवेदन दिन योग्य हुनेछन् । अमेरिकामा अनुपस्थीतिको पहिले, अनुपस्थीतिकै अवधिमा वा पछि समेत उनीहरुले अमेरिकी नागरिकता आवेदन एन ४०० दिनसक्ने स्पष्ट पारिएको छ । उनीहरुले आवासीय निरन्तरताको संरक्षणका लागि एन ४७० समेत भर्नु नपर्ने जनाइएको छ ।
उनीहरु अमेरिकाबाहिर पूजारी वा धार्मिक सहायकका रुपमा रहेको अवधि आवासीय निरन्तरताकै रुपमा अर्थात् अमेरिकाभित्रै रहेको अवधिको रुपमा गणना गरिने छ । तर उनीहरुले अमेरिकी नागरिकता प्राप्तीका लागि अमेरिकी नागरिकका दम्पत्तिका सन्दर्भमा ग्रिनकार्ड प्राप्त गरेको ३ बर्ष र अन्यका सन्दर्भमा ग्रिनकार्ड प्राप्त गरेको ५ बर्ष पूरा भएको हुनुपर्ने मापदण्ड भने अन्य आवेदकले जस्तै पूरा गर्नुपर्छ ।
यो नीति निर्देशिका तुरुन्तै लागु हुने जनाइएको छ । तर जुन २५ सम्म कमेन्ट समेत गर्न सकिने भएको छ ।
सामान्यतया अमेरिकी नागरिकताका लागि आवेदन दिंदा आवासीय निरन्तरताको नियम लागु हुन्छ । जस अनुशार ग्रिनकार्डवाहक व्यक्ति अमेरिका छाडेको ६ महिनाभित्र अमेरिका भित्र प्रवेश गरेको हुनुपर्छ । ५ बर्षको अवधिमा ३० महिना अमेरिका बसेको हुनुपर्छ । तर एकपटककै बसाईमा ६ महिना बढी अमेरिकाबाहिर बसेको खण्डमा भौतिक रुपमा आवासीय निरन्तरता भंग हुन्छ ।
यदि विदेशमा काम गर्ने अमेरिकी सरकारको कर्मचारी भएको खण्डमा, अन्तर्राष्ट्रिय संस्थामा काम गर्ने व्यक्ति भएको खण्डमा, अमेरिकामा रहेको धार्मिक संस्थाको विदेशमा रहेको काममा गएको खण्डमा सुविधा पाउने प्रावधान युएससीआईएसमा छ । अमेरिकी सेनामा रहेका व्यक्तिका ग्रिनकार्डवाहक परिवार जागिरको कारणले ६ महिनाभित्र अमेरिका आउन नसकेका पनि छुट पाउन सक्छन् ।
