म्यान्मारमा ११ वर्षको जेल सजाय सुनाइएका अमेरिकी पत्रकार डेनी रिहा
प्रकाशित मिति : कार्तिक २९, २०७८ सोमबार
अमेरिकी पत्रकार ड्यानी फेन्स्टरलाई म्यानमारको जेलबाट रिहा गरिएको छ । व्यक्तिगत मानवीय भ्रमणका क्रममा म्यानरमार गएका उनलाई जेलबाट रिहा गरेर देशनिकाला गरिएको शैन्य प्रवक्ता जाओ मिन तुनले बताएका छन् । रिहा भएका पत्रकार फेन्स्टर कतारहुँदै अमेरिका आउने भएका छन् ।
ती पत्रकारलाई शुक्रबारमात्र म्यानमारको जुन्टा अदालतले ११ वर्षको जेल सजाय सुनाएको थियो । गैरकानूनी संगत, सेनाविरुद्ध उक्साउने र भिसा नियम उल्लंघन गरेको लगायतका आरोपमा दोषी ठहर गर्दै ड्यानी फेन्स्टरलाई जेल सजायको फैसला सुनाइएको थियो । उनलाई किन रिहा गरियो भन्नेबारे थप विवरण शीघ्र सार्वजनिक गरिने जनाइएको छ ।
३७ बर्षका पत्रकार फेन्स्टर अमेरिकाको मिसिगन निवासी हुन् । उनलाई अमेरिका फर्कने क्रममा गत मे महिनामा याङ्गुनस्थित अन्तर्राष्ट्रिय विमानस्थलबाट पक्राउ गरिएको थियो।ड्यानीले जुलाई २०२० मै म्यान्मार नाओबाट राजीनामा दिएका थिए र अर्को महिना फ्रन्टीअरसँग आबद्ध भएका थिए । मे २०२१ मा पक्राउ पर्दा उनी नौ महिनाभन्दा बढी समयदेखि फ्रन्टीअरमा काम गर्दै आएका थिए।
सेनाले गत फेब्रुअरीमा ‘कू’ गरी सत्ता लिएपछि प्रेसलाई पनि नियन्त्रणमा लिएको छ । सैैन्य कूविरुद्ध प्रर्दशन र आलोचना गर्ने दर्जनौं पत्रकारहरूलाई सैनिक सरकारले गिरफ्तार गरेको छ । स्थानीय अनुगमन समूहका अनुसार सैन्य कूका विरोधमा भएको प्रर्दशनको क्रममा १२ सय भन्दा बढी व्यक्तिहरू मारिएका थिए भने हजारौ पक्राउ परेका थिए ।
पत्रकार फेन्स्टरलाई याङ्गुनको इन्सेन जेलमा राखिएको थियो । उनलाई देशद्रोह र आतंकवादको आरोप पनि लगाइएको थियो ।
राष्ट्रसंघका अनुशार म्यानमारमा सेनाले सत्ता कब्जा गरेयता १२६ पत्रकारहरुलाई पक्राउ गरिएको छ जसमध्ये ४७ जना अझै हिराशतमा रहेका छन् । ७ जनालाई दोषी ठहर गरिएकोमा ६ जना म्यानमारका पत्रकार हुन् । ४ जनालाई गत अक्टोबरमा आममाफी दिइएको थियो ।
