नेवा: नख: न्यूयोर्कको नयॉं कार्यसमिति, अध्यक्ष महेन्द्र बीर बज्राचार्य, सल्लाहकार बिष्णुमान प्रधान
प्रकाशित मिति : पुस ७, २०७८ बुधबार
नेवा: नख: न्यूयोर्कको नयॉं कार्यसमितिको अध्यक्षमा महेन्द्र बीर बज्राचार्य निर्वाचित भएका छन् । प्रथम उपाध्यक्षमा डा. नरेश मान शाक्य, द्वितीय उपाध्यक्षमा श्रुति अमात्य, महासचिवमा तुलसी नारायण चित्रकार, सचिवमा संगीता मुखिया छोंचू, कोषाध्यक्षमा सलोनी वन्त श्रेष्ठ, सह-कोषाध्याक्षमा मेनी श्रेष्ठ निर्विरोध निर्वाचित भएका छन् भने कार्यसमिति सदस्यहरुमा नम्रता प्रधान, दिपक कुमार प्रधान, महेन्द्र कुमार बज्राचार्य, संजन प्रधान, राधिका श्रेष्ठ, अभिषेक छोंचू र शोभना शाक्य निर्विरोध निर्वाचित भएका छन् । नखःको बिधान अनुसार स्वतः निर्वतमान अध्यक्ष बिष्णु मान प्रधान संस्थाको सल्लाहाकार भएका छन् ।
नेवा: नख: न्यूयोर्कको तेस्रो निर्वाचन, प्रमुख निर्वाचन आयुक्त, संस्थापक अध्यक्ष बीरेन्द्र प्रधानले सम्हाल्नु भएको थियोे । उक्त निर्वाचन कमिटीले नयॉं कार्यसमितीको निर्वाचन गरेका थिए ।
बन्द सत्रमा, अध्यक्ष बिष्णु मान प्रधानले नव निर्वाचित कार्यसमितिलाई सफल कार्यकालको लागि शुभकामना दिएका थिए भने सभामा उपस्थित सबै सदस्यहरूलाई उहॉंहरूको सहयोग, सपोर्ट र गरिमामय उपस्थितिको लागि हार्दिक धन्यवाद ज्ञापन गरेका थिए । साथै उहॉंले अहिलेसम्म नखःको विभिन्न कार्यक्रममा सहयोग गर्नुहुने सम्पूर्ण संघ-संस्था, महिला तथा पुरूष स्वयंमसेवी र सहयोगी दाताहरूलाई विशेष धन्यवाद दिएका थिए। बिदेशमा रहेर पनि नेवाः परम्परा, कला-संस्कृति, चाड-पर्व जोगाउन र प्रवर्द्धन गर्न हामी सबै एकजुट भई अगाडी बढ्नु पर्ने कुरामा जोड दिएका थिए ।
नेवा: कला संस्कृतिको क्षेत्रमा काम गर्दै सबै समुदायसँग हातेमालो र सहकार्य गर्दै सबै मिली सबैको सहयोगमा नख:लाई अगाडि बढाउने कुरा नव निर्वाचित अध्यक्ष महेन्द्र बीर बज्राचार्यले व्यक्त गरेका थिए भने अन्य पदाधिकारीहरू तथा सदस्यहरूले पनि आ-आफ्ना प्रतिवद्धता व्यक्त गरेका थिए ।
नेवा: नख: न्यूयोर्क – नेवा: परम्परा, कला र संस्कृतिको संरक्षण र प्रवर्द्धनका लागि सन २०११ मा न्युयोर्कमा स्थापना गरिएको संस्था हो । यो संस्थाले समुदायको हितका लागि विभिन्न कार्यक्रमहरू सञ्चालन गर्दै आएको छ ।
नेवा: नख: न्यूयोर्कका तत्कालिन महासचिव डा. नरेश मान शाक्यद्वारा जूमको माध्यमबाट संचालन गरिएको साधारण सभाको अध्यक्षता नख:का अध्यक्ष बिष्णु मान प्रधानले गरेका थिए भने प्रमुख अतिथिमा नख:का संस्थापक अध्यक्ष बीरेन्द्र प्रधान थिए । उक्त सभामा उपस्थित सबैलाई उपाध्यक्ष महेन्द्र बीर बज्राचार्यले आफ्नो मन्तव्य मार्फत स्वागत गरेका थिए । नख:का संस्थापक अध्यक्ष बीरेन्द्र प्रधान, संस्थापक सचिव संजय शिलाकार र सल्लाहाकार राज कुमार श्रेष्ठले कार्यक्रम सफलताको शुभकामना दिएका थिए । कार्यक्रमको शुरूमै उपस्थित सदस्यहरूको सहभागी दर्ताको कार्य, सचिव संगिता मुखिया छोंचू र सह-कोषाध्यक्ष सलोनी वन्त श्रेष्ठले गरेका थिए ।
खुल्ला सत्रमा, महासचिव डा. नरेश मान शाक्यले संस्थाको कार्य प्रगति विवरण तथा गति-बिधीहरू फोटो र भिडियो प्रस्तुत गरी पेश गरेका थिए भने अध्यक्ष बिष्णु मान प्रधान र सह-कोषाध्याक्ष सलोनी वन्त श्रेष्ठले आर्थिक प्रतिवेदन पेश गरेका थिए ।
सभामा, दिवंगत हुनुभएका नखःका पूर्व सल्लाहाकार अजय मान छोँचूको संझनामा एक मिनेट मौन धारणा गरिएको थियो भने उहॉंले संस्थालाई दिनु भएको अमुल्य योगदानको प्रशंसा गरिएको थियो र उहॉं सहभागी भएको कार्यक्रमको फोटो र भिडियो पनि प्रस्तुत गरिएको थियो । सबै सहभागीहरूले उहॉंको आत्माको चिर शान्तिको कामना व्यक्त गर्दै स-सम्मानका साथ हार्दिक श्रद्धांजली दिए । बक्ताहरूले उहॉंको बारेमा बोल्दै गर्दा केही क्षण सबै सहभागीहरू भावविहोर भएका थिए ।
