क्यालिफोर्नियामा स्टोरमा कार्यरत नेपालीमाथि गोली प्रहार, एकरातमा ५ स्टोरमा लुटपाट
प्रकाशित मिति : पुस ७, २०७८ बुधबार
क्यालिफोर्नियाको लस एन्जलसमा स्टोरमा कार्यरत एकजना नेपालीमाथि गोली प्रहार भएको छ । लुटेराहरुले सोमबार बेलुका स्टोरमा कार्यरत नेपालीमाथि गोली प्रहार गरेका हुन् । स्टोरपनि नेपालीहरुबाट नै संचालित रहेको जनाइएको छ ।
लुटेराहरुले ६ वटा गोली हानेकोमा तीनवटा गोलीले टाउकोमा लछारेको जनाइएको छ । घाइते नेपालीलाई तत्काल अस्पताल लगिएको थियो । अहिले आफ्नो अवस्था सामान्य रहेको घाइते नेपालीले खसोखासलाई जानकारी दिए ।
२० बर्षको हाराहारीमा रहेका तीनजना लुटेराहरुको समुहले बीबी गनबाट गोली चलाएको जनाइएको छ । उनीहरुले चारवटा सिटीमा एकघण्टाभित्र पाँचवटा स्टोरहरु लुटेको जनाइएको छ ।
लेकउड, आर्टेसिया, नर्वाक र बेलफ्लावरमा रहेका पाँचवटा चुरोट र भाप स्टोरमा लुटपाट भएको थियो । उनीहरुले ती स्टोरहरुबाट हजारौं डलर लुटेको प्रहरीले जनाएको छ ।
लुटेराहरु हुडी र मास्क लगाएर आएको पीडितहरुले बताएका छन् । उनीहरु ग्राहकजस्तै बनेर स्टोरभित्र छिरेका थिए । त्यसपछि टाउकोमा बन्दुक तेर्साएर रकम मागेका थिए । आर्टेसियाको स्टोरबाट अन्य सामान र ग्राहकको घाँटीको चेनसमेत लुटेको जनाइएको छ ।
लुटपाट भएका पाँचवटै स्टोरहरु अहिले खुलिसकेका छन् । दुईवटा स्टोरको सेक्युरिटी क्यामेरामा भिडियो रेकर्ड भएको तर ती भिडियो प्रहरीलाई बुझाइएको जनाइएको छ ।