निर्णय ढिलो भएका ग्रिनकार्ड लगायतका आवेदनका लागि सोधपुछ गर्ने टुलको नयाँ भर्सन ल्याइदै
प्रकाशित मिति : माघ १४, २०७८ शुक्रबार
युएससीआईएसले समयमै निर्णय नआएका ग्रिनकार्ड लगायतका अध्यागमन आवेदनका लागि अनलाइनबाट सोधपुछ टुलको नयाँ भर्सन ल्याउन लागेको छ । त्यसका लागि डिपार्टमेन्ट अफ होमल्याण्ड सेक्युरिटीले ६० दिनको कमेन्ट अवधि तय गर्दै फेडरल रजिष्टरमा सुचना प्रकाशित गरेको छ ।
फेडरल रजिष्टरमा प्रकाशित सुचना यहाँ हेर्नुहोला ।
सामान्य प्रकृया अवधिभन्दा बढी समय लागेका आवेदनमा अनलाइन मार्फत सोधपुछ गर्न सकिने व्यवस्था रहेकोमा त्यसको नयाँ भर्सन ल्याउन लागिएको हो । समयमै निर्णय नआएका, आवेदन पछि बायोमेट्रिक लगायतका सुचना प्राप्त गर्न नसकेका, हुलाकबाट कार्ड वा अन्य कागजात प्राप्त गर्न नसकेकाहरुले अनलाइनमार्फत अनुरोध गर्नसक्छन् ।
त्यस्तै युएससीआइएसले नाम लगायतका कुनै विवरणको टाइपमा गरेका गल्तीका सन्दर्भमा पनि यो टुलमार्फत जानकारी गराउन सकिन्छ । कुनै अप्वाइन्टमेन्ट आवश्यक पर्दा समेत यो टुलको प्रयोग गर्न सकिन्छ । सोधपुछका क्रममा प्राप्त विवरणका आधारमा युएससीआईएसले आवेदन हेरेर उचित कदम चाल्छ ।
आफ्नो आवेदन नियमित अवधिभन्दा बढी लागे नलागेको थाहा पाउन यहाँ क्लीक गर्नुहोला । आवेदनको नाम र सर्भिस सेन्टर वा फिल्ड अफिसको नाम हालेपछि अधिकतम अवधि देख्न सक्नुहुनेछ ।
यसरी अनलाइनबाट सोधपुछ गर्दा कुनै शुल्क तिर्नु पर्दैन । नोभेम्बर १ देखि लागु हुनेगरी युएससीआईएसले ६ महिनाको अवधिका आधारमा कुनै आवेदनमा लाग्ने प्रकृयाको अधिकतम र न्यूनतम अवधि निर्धारण गर्दै आएको छ । यसभन्दा अगाडि एक महिनाको अवधिका आधारमा कुनै पनि आवेदनमा लाग्ने प्रकृयाको अधिकतम र न्यूनतम अवधि निर्धारण गरिदै आएको थियो ।
