न्युयोर्क सिटी ट्रेन स्टेशनमा बलात्कार गर्न खोज्ने व्यक्ति अझै फरार, प्रहरीबाट स्केच जारी
प्रकाशित मिति : माघ २२, २०७८ शनिबार
न्युयोर्क सिटीको म्यानहटनमा ट्रेन स्टेशनमा बलात्कार गर्न खोज्ने एक व्यक्तिले प्रहरीले व्यापक खोजी गरिरहेको छ । प्रहरीले उक्त व्यक्तिको स्केच जारी गर्दै कसैले कुनै जानकारी पाएमा न्युयोर्क सिटी प्रहरीको क्राइम स्टपर हटलाइन ८०० ५७७ ८४७७ मा फोन गर्न आग्रह गरेको छ ।
उक्त व्यक्तिले जनवरी १४ मा ट्रेनको पखाईमा रहेकी एक ४५ बर्षकी महिलालाई बलात्कार प्रयास गरेको थियो । १४ स्ट्रीट र सेभेन्थ एभिन्युमा राती साढे ११ बजे १, २, ३ नम्बर ट्रेन लाइनमा उक्त घटना भएको हो ।
बलात्कार प्रयास गर्ने व्यक्तिले महिलाको नजिक आएर महिलालाई मुक्का हानेर लडाएको थियो । महिलालाई भूईमा लडाएर बलात्कार प्रयास गरेपछि पीडितलाई सहयोग गर्न एकजना यात्रुले हस्तक्षेप गरेपछि बलात्कार प्रयास गर्ने व्यक्ति भागेको थियो ।
उत्तरतिर गइरहेको ट्रेनमा चढेर उक्त व्यक्ति भागेको थियो । पीडितले मेडिकल सहायता अस्वीकार गरेकी थिइन् । प्रहरीले उक्त व्यक्तिका बारेमा जानकारीसहित आएका फोनकल गोप्य राखिने जनाएको छ ।