न्युजर्सीमा साना व्यवसायले ५० हजार डलरसम्मको सहायता प्राप्त गर्न आवेदन सुरु
प्रकाशित मिति : फाल्गुन १, २०७८ आईतबार
न्युजर्सीमा ५० हजार डलरसम्मको सहायता प्राप्त गर्न आवेदन सुरु भएको छ । न्युजर्सीको आर्थिक सहायता प्राधिकरणले साना व्यवसायका लागि नयाँ चरणको सहायता कार्यक्रम सुरु गरेको हो ।
१५ मिलियन डलरको यो सहायता कार्यक्रम अन्तरगत योग्य व्यवसायहरुले ५ हजारदेखि ५० हजार डलसम्मको सहायता प्राप्त गर्न सक्नेछन् । पहिले नै पूरा भएको परियोजनाका लागि क्षतिपूर्ति रकम समेत साना व्यवसायहरुले प्राप्त गर्नसक्नेछन् । यो कार्यक्रमका लागि योग्य हुन व्यवसायले स्थानको मापदण्ड पूरा गरेको हुनुपर्छ ।
कार्यक्रमबारे थप जानकारी र आवेदन दिनका लागि यहाँ क्लीक गर्नुहोला ।
समग्र परियोजना मूल्यको ५० प्रतिशतसम्म रकम प्राप्त गर्न सकिनेछ अर्थात् १ लाख डलरसम्मको परियोजनामा बढीमा ५० हजार डलरसम्म पाउन सकिनेछ । परियोजनाको लागत कम्तीमा ५ हजार डलर हुनुपर्नेछ । साना व्यवसाय र गैर नाफामुलक व्यवसायले पनि आवेदन दिनसक्ने जनाइएको छ ।
२५ हजारभन्दा तलको सहायताका लागि परियोजना २ बर्षभित्र पूरा गर्नुपर्छ भने त्योभन्दा माथिको सहायताका लागि ४ बर्षभित्र पूरा गर्नुपर्छ ।