न्युयोर्कको ट्रेन स्टेशनमा भएको गोलीकाण्डमा १६ घाइते, १० जनामाथि गोली प्रहार
प्रकाशित मिति : चैत्र २९, २०७८ मंगलबार
न्युयोर्कको ब्र्रुकलिनमा ट्रेन स्टेशनमा गोली चल्दा कम्तीमा १६ जना घाइते भएका छन् । कम्तीमा १० जनामाथि गोली लागेको प्रहरीले जनाएको छ । ग्यास मास्क लगाएको व्यक्तिले धुँवा बम फ्याक्नुका साथै यात्रुहरुमाथि गोली चलाएको जनाइएको छ ।
सनसेट पार्क ३६ स्ट्रीटमा विहान साढे ८ बजे गोली चलेको जनाइएको छ । घटनास्थलमा विष्फोट गराउन बाँकी रहेका कैयन उपकरणहरु भेटिएको प्रहरीले जनाएको छ ।
घटनास्थलका तस्वीरहरुमा कैयन यात्रुहरु रगतपच्छे भएको देखिएको छ । एकजना साढे ५ फुटको अश्वेत व्यक्तिले एकप्रकारको सिलिण्डर खसालेको प्रत्यक्षदर्शीले बताएका छन् । उक्त व्यक्तिले सुन्तला रंगको भेष्ट र ग्यास मास्क लगाएको जनाइएको छ ।
न्युयोर्क सिटी प्रहरीको बम्ब डिस्पोजल टोली घटनास्थलमा पुगेको छ । घटनाबारे अनुसन्धान भइरहेको प्रहरीले जनाएको छ । आक्रमणकारीले एमटीएका कर्मचारीले जस्तै देखिने कपडा लगाएको जनाइएको छ ।
घाइतेहरुलाई नजिकका अस्पतालहरुमा लगिएको छ । घटनाबारे न्युयोर्क सिटीका मेयर एरिक आडम्सलाई जानकारी दिइसकिएको छ ।